Sanatoryj «Biełaruś» u Sočy, jaki naležyć Kiraŭnictvu spravami prezidenta, tarpiedujuć sudovymi pozvami
«Naša Niva» źviarnuła ŭvahu na situacyju vakoł sanatoryja «Biełaruś» u Sočy, jaki naležyć Kiraŭnictvu spravami prezidenta.
Jak vynikaje z rasijskaj arbitražnaj bazy, ad kanca minułaha hoda sanatoryj «Biełaruś» biaskonca tarpiedujuć pazovami.
«Sočitiepłoenierho», «Finansovo-Stroitielnaja Hruppa Korporacija», Fiederalnaja słužba pa nadhladzie ŭ śfiery suviazi, «Sočivodokanał»: voś kampanii, jakija niešta patrabujuć ad sanatoryja.
«Sočitiepłoenierho», naprykład, spahaniaje z «Biełarusi» amal 460 tysiač rasijskich rubloŭ ($7400) za spažyvańnie ciepłavoj enehrii, hrupa «Korporacija» patrabuje trochi bolš za 20 miljonaŭ rubloŭ ($319 tysiač) niaŭstojki, a taksama «adstotkaŭ za karystańnie čužymi hrašovymi srodkami», Upraŭleńnie pa nadhladzie ŭ śfiery suviazi pryciahnuła sanatoryj da administratyŭnaj adkaznaści za ažyćciaŭleńnie pradprymalnickaj dziejnaści biez dazvołu i hetak dalej.
«Naša Niva» pazvaniła ŭ sanatoryj udakładnić, z čym źviazanaja vialikaja kolkaść pazovaŭ.
Na pytańni adkazaŭ namieśnik dyrektara Dźmitryj Śmirnoŭ.
Jon zapeŭnivaje, što sudovyja spravy nie niasuć pahrozy sanatoryju.
«U nas usio narmalna. Što datyčyć «Karparacyi», to hetaja firma ŭ nas piać hadoŭ tamu niešta budavała. Jany ličać, što narabili na adnu sumu, a my ličym, što mienš, bo ŭ nas byli pretenzii da jakaści ich raboty. Kali ja pryjechaŭ siudy, to my za imi daroblivali heta ź biełaruskim «Mazyrprambudam». I voś my ŭsie hetyja hady sudzimsia, štohod.
Z vodakanałam ža takaja historyja: ja asabista ŭziaŭ čatyry z pałovaj hoda tamu ŭ ich techničnyja ŭmovy na padklučeńnie vady i kanalizacyi, a vadu ja puściŭ tydzień tamu. Heta šmat kaža pra toje, što tam za arhanizacyja. Taksama raniej jon byŭ pryvatnaj firmaj, a ciapier staŭ municypalnaj. A taja — raniejšaja — arhanizacyja padaje na nas u sud za toje, što my ich nie puścili brać proby kanalizacyi.
Heta viedajecie, kali ŭ domie sanstancyja apyrskvaje padvały suprać kamaroŭ u lubym razie, jość jany ci niama, to rana ci pozna ich u dom nie puskajuć. Dyk voś i ŭ nas tak było, a jany nastojvajuć, što my parušyli niejkija normy, choć my ich navat nie puścili — jany heta tak traktujuć. Z elektrasuviaźziu ŭ nas viečnyja prablemy.
Sudy — heta narmalna dla Rasii. A voś pra «Sočyciepłaenerha», pa ščyraści, jašče nie viedaju. U nas tut dva abjekty — sanatoryj u Sočy i kompleks u Čyrvonaj palanie. Pa-pieršaje, tut nie choładna, pa-druhoje, u nas jość svaje kacielni. Tamu ja nie viedaju, što jany tam chočuć, peŭna, niejkaja drabiaza taksama», — patłumačyŭ Śmirnoŭ.
My spytalisia ŭ jaho, ci heta ŭsio biahučyja prablemy, ci heta nie moža być recham palityčnych abvastreńniaŭ apošniaha času?
«Nie varta stavić nas u adzin šerah z małakom. Chacia, kaniečnie, ja raniej budavaŭ fiermy ŭ Bresckaj vobłaści, pracavaŭ na «Savuškavym», ja cudoŭna viedaju, jak małako robicca. I toje, što ichnija sanitarnyja daktary raskazvajuć, heta łuchta ŭsio. Ale ŭ nas nie takoje, nie», — padsumavaŭ jon.
Ciapier čytajuć
Trahiedyja z 30‑hadovaj doktarkaj sa Starobina — pajšła vydalać zub mudraści i pamierła20
Kamientary