Aktyvist «Lehałajz Biełaruś» Markiełaŭ, jaki pravioŭ troje sutak na Akreścina za fotašop: «U kamiery mnie prapanoŭvali hašyš»
Piatra Markiełava zatrymali 1 červienia, kali jon pryjšoŭ da namieśnika načalnika Maskoŭskaha RUUS Minska Siarhieja Astafjeva. Napiaredadni Markiełaŭ vykłaŭ u fejsbuku fatazdymki, dzie jon trymaje płakat «Zabłakujcie 86.57.250.202» la budynka MUS. Heta IP-adras Ministerstva ŭnutranych spravaŭ.
Ciapier Markiełaŭ kaža, što zdymak byŭ fotašopam. «My sfatahrafavali budynak Ministerstva, a potym zrabili majo fota na pryvatnaj terytoryi», — kaža aktyvist.
U mai Ministerstva infarmacyi sumiesna z MUS zabłakavała dostup da sajta «Lehałajz Biełaruś». Markiełaŭ chacieŭ davieści situacyju da absurdu, kab jaho asudzili za akcyju, jakoj nie było.
«Našaj milicyi nie patrebnyja dokazy. Navat toje, što ja pravioŭ troje sutak u nialudskich umovach na Akreścina pra mnohaje kaža. Faktyčna za hety čas nas karmili tolki čatyry razy. Dva razy na śniadanki davali harbatu i kašu, a abied i viačeru abjadnoŭvali. Viadoma ž, nie było ni myła, ni papiery», — raskazvaje Markiełaŭ.
Aktyvist kaža, što było vielmi padobna na toje, što suprać jaho rychtavali pravakacyju. «U subotu ŭ kamiery źjaviŭsia chłopiec, jaki, jak tolki za im začynilisia dźviery, staŭ prapanoŭvać mnie hašyš. I ŭvieś čas jaho kuryŭ praź pipietku. Ja, zrazumieła, admaŭlaŭsia, ale jon uvieś čas nastojvaŭ. Niezrazumieła, jak jon moh pranieści hetuju pipietku i hašyš, kali pierad tym, jak pasadzić u kamieru, raździavajuć dahała i navat prosiać prysieści, kab ty ničoha ŭ dupie nie pranios».
U sudzie spravu Markiełava adpravili na dapracoŭku. «Jany nie mahli navat pryznać, što pamylilisia», — kaža chłopiec.
«Bulba» z Oršy pajšoŭ vajavać za Rasiju — ciapier siastra šukaje jaho ci chacia b jaho pareštki9
Kamientary