Pra plamy na ciele, nalot na jazyku i inšyja niazručnyja zachvorvańni — raskazvaje dermatołah
Luboje zachvorvańnie skury — prablema davoli intymnaja. Mnohija saromiejucca iści da dermatołaha i ŭ vyniku źviartajucca pa dapamohu tolki tady, kali chvarobu ŭžo nie schavać.
Pra najbolš častyja prablemy skury my raspytali dermatavienierołaha miedycynskaha centra «Łade» Kaciarynu Doraš. A taksama paprasili dać parady, jak zaścierahčy siabie ad takich niepryjemnaściaŭ.
— Jakija hrybkovyja zachvorvańni skury sustrakajucca najčaściej?
— Viasnoj i letam u siarednich šyrotach šmat u kaho źjaŭlajecca roznakalarovy lišaj (votrubjevidny lišaj, małasiezijoz). Ličycca, što na jaho pakutuje kala 10% usiaho nasielnictva śvietu. U śpiakotnych krainach roznakalarovy lišaj sustrakajecca čaściej. Na ciele źjaŭlajucca plamy koleru kavy z małakom abo šera-ružovyja, roznych abrysaŭ i pamieraŭ. Časam moža być adčuvańnie śvierbu.
— Jak na ciele źjaŭlajecca hrybok?
— Uzbudžalnik moža pieradasca ad chvoraha roznakalarovym lišajem, naprykład, na plažy abo ŭ ahulnym łožku. Spryjalnymi ŭmovami dla hrybka ličacca pavyšanaja patlivaść, parušeńnie vuhlavodnaha abmienu, viehietadystanija, nieracyjanalny hihijeničny režym.
— A jaki hihijeničny režym možna ličyć racyjanalnym?
— Častaść hihijeničnych pracedur zaležyć ad navakolla, ładu žyćcia i anatamičnych asablivaściaŭ čałavieka. Ciopły i niepraciahły duš adzin-dva razy na dzień možna prymać biez myła, hielaŭ i šampuniu. Čałaviek, jaki rehularna dahladaje za pachvinnaj vobłaściu i padpachami, nie maje patreby ŭ štodzionnym dušy — dastatkova pravodzić vodnyja pracedury praź dzień. Aptymalnaja tempieratura vady — 37 hradusaŭ.
— Jak dyjahnastujecca i lečycca roznakalarovy lišaj?
— Ličycca, što najbolš dakładna vyjaŭlaje roznakalarovy lišaj mikraskapičnaje daśledavańnie — saskob z vysypańniaŭ na skury. Taksama zachvorvańnie možna vyjavić z dapamohaj lampy Vuda, jakaja «afarboŭvaje» ŭčastki paražeńnia ŭ ciomna-karyčnievy abo čyrvanavata-žoŭty koler. U bolš lohkich formach lišaj lečać srodkami dla vonkavaj terapii, u bolš składanych, pry nieefiektyŭnaści miascovaj terapii — pryznačajuć preparaty ŭnutr.
— Jakija jość sposaby prafiłaktyki?
— U prafiłaktycy recydyvaŭ važnaje značeńnie maje pazbaŭleńnie ad patlivaści, dezynfiekcyja bializny i paścieli.
— Jak prajaŭlajecca małočnica?
— Heta samaja raspaŭsiudžanaja forma orafarynhijalnaha kandydozu. Paražacca moža połaść rota, hłotki, čaściej za ŭsio — ščoki, radziej — padniabieńnie, jazyk. Źjaŭlajucca biełyja kropkavyja naloty, plonki. Nalot lohka zdymajecca, ale paśla jaho źniaćcia zaŭvažnaje jarka-čyrvonaje asnavańnie. Paražeńni balučyja, časam uźnikajuć i jazvy. Naloty, acioki mohuć być i na jazyku. Prajavaj kandydozu taksama mohuć być pačyrvanieńni kajmy vusnaŭ, suchaść, piakota, ściahvańnie. Zajedy (kandydoz kutoŭ rota) mohuć raźvivacca samastojna biez paražeńnia ślizistaj rotavaj połaści.
— Jak adroźnić prosty nalot na jazyku ad kandydozu?
— Kali havorka pra pavierchnievyja formy kandydozu, to dastatkova pravieści mikraskapičnaje daśledavańnie (robicca saskob sa ślizistaj abałonki połaści rota). Pravodzić kantrolnyja daśledavańni na droždžapadobnyja hryby asabliva važna chvorym na cukroŭku, tym, chto pakutuje na chvaroby kryvi, złajakasnyja novaŭtvareńni i imunadeficyty.
— Ci varta naviedvać dermatavienierołaha prosta dziela prafiłaktyki, navat kali niama prablem sa skuraj?
— Nie zaŭsiody čałaviek u stanie vyznačyć, jość u jaho prablemy sa skuraj ci nie. Tamu raz na hod pažadana heta rabić.
Kamientary