«Ja i nie zdahadvaŭsia, što žančyny tak šmat dumajuć pra seks»
U miežach kinafiestyvalu «Paŭnočnaje źziańnie» u Minsku byŭ prademanstravany dacki film «Vieniera» (Venus. Let`s talk about sex) pra seksualnaść žančyn. I tym cikaviejšaja hetaja padzieja, što na abmierkavańni stužki arhanizatary vykazali dumku, što padobnaje režysiorskaje daśledavańnie moža źjavicca i ŭ Biełarusi. Prosta ŭ kinateatry «Mir» usie achvotnyja hledačy pakidali svaje kantakty, kab ź imi źviazalisia, kali ideja źniać takoje ž ščyraje kino pra seks, sapraŭdy stanie realnaściu.
Film «Vieniera» naradziŭsia, kali dźvie režysiorski z Danii Miete Karła Albrektsan, Lea Hłob zrazumieli, što ŭžo darosłyja, ale ničoha tołkam nie viedajuć ni pra svajo cieła, ni pra farmiravańnie svaich žadańniaŭ. Jany vyrašyli źniać pra heta film, a kab jon atrymaŭsia bolš abjektyŭnym, abjavili kastynh, na jaki zaprasili dziaŭčat da 35 hod parazvažać na hetuju pikantnuju temu.
Ciaham čatyroch hod, z 2011 pa 2015, jany padrabiazna, na kamieru, apytali kala 100 žančyn. U vyniku 22 historyi z prajekta trapili ŭ finalny mantaž filma «Vieniera», jaki ŭvajšoŭ u trojku samych kasavych u Danii. I demanstravali jaho nie tolki ŭ Kapienhahienie, a pa ŭsioj krainie.
Pa formie dla hledačoŭ film dosyć prosty. Žančyny z roznaj kolkaściu seksualnych partnioraŭ u minułym i zusim bieź ich, prosta na kamieru raskazvajuć pra seks, soram, źviazany z hetaj temaj, jurlivaść i zadavalnieńnie.
Adny adkryta dzielacca dumkami pra samyja šalonyja fantazii, inšyja pryznajucca ŭ tym, što navat u darosłym žyćci nie adčuvajuć siabie ŭpeŭniena aholenaj: pavaročvajucca śpinaj da partniora, kali pieraapranajucca, u lusterka ž bieź nižniaj bializny hladzieć na siabie nie mohuć zusim. Raskazvajuć, jakim słovam nazyvajuć vahinu. A samyja śmiełyja raździavacca pierad kamieraj dla aŭtapartreta (chacia heta tolki adna nahoda. Hłabalna takim čynam i režysiorki, i hieraini ŭ kadry vypraboŭvajuć siabie na zdolnaść nie chavacca pad płastami adzieńnia, pryniać svajo cieła takim, jakoje jano jość, i svabodna bačyć jaho paśla na manitory i ekranach kinateatraŭ bujnym płanam).
Žančyny na kastynh prychodzili samyja roznyja. Zvyčajnyja. I paśla, kali «Vieniera» była ŭžo ŭ prakacie, adzin mužčyna spytaŭsia ŭ pradziusarki Kirstyn Barfod: «Čamu vy admysłova panabirali dla karciny brydkich žančyn?». Kirstyn pasprabavała apraŭdać hledača, vykazaŭšy zdahadku, što jon prosta pryzvyčaiŭsia bačyć u kiniematohrafie idealnych aktrys. I voś zmahańnie z takoj situacyjaj — adna z zadač filma: supraćstajać vylizanamu vobrazu žančyny ŭ masavaj kultury, pradstaŭlać ich realnymi, z nadzionnymi prablemami i strachami.
Paśla pakazu adbyłosia abmierkavańnie «Vieniery» z hledačami i mini-dyskusija na temu «Farmiravańnie žadańniaŭ u razrezie masavaj kultury» z udziełam dyrektarki kinafiestyvalu «Paŭnočnaje źziańnie» Volhaj Čajkoŭskaj, zasnavalnicaj prajekta «Hiendarny maršrut» Irynaj Sałamacinaj, paetkaj Volaj Hapiejevaj i pradziusarkaj dackaj kinastužki Kirstyn Barfod.
Na fonie rabočych pytańniaŭ pra toje, jak adbyvałasia praca nad filmam, vydzieliŭsia kamientar maładoha čałavieka pra toje, što jon navat i nie zdahadvaŭsia, što žančyny tak šmat dumajuć pra seks (na ekranie adny dziaŭčaty raskazvali, što mohuć dumać pra heta raz 5 na dzień, a inšyja — i kožnuju hadzinu). Chłopiec padzialiŭsia mierkavańniem, što ciapier budzie lepš razumieć žančyn.
I heta cikavy momant. Bo niahledziačy na toje, što temami seksu siońnia pierapoŭnienyja i knihi, i ŚMI, i rekłama, my ŭsio jašče drenna raźbirajemsia ŭ svaich žadańniach i žadańniach partniora.
«Pra seks siońnia pišuć šmat, ale masavaja kultura pracuje z hetaj temaj tolki tak, jak vyhadna joj. U časopisach možna znajści artykuły «Jak zadavolić partniora?». Ale mała pra toje, jak atrymać asałodu samomu», — ličyć paetka Volha Hapiejeva.
«Mnohija maładyja žančyny siońnia ŭžo i nie viedajuć, što takoje seksualnaja revalucyja i pra što jana była. I niadziŭna, bo kali tema seksu nie abmiarkoŭvajecca, to žančyny zajmajucca inšymi spravami. I takim čynam lohka moža adbycca histaryčny adkat: viartańnie da kansiervatyzmu, da taho, što žančyny ŭvohule nie buduć sprabavać zrazumieć, što im padabajecca ŭ seksie, bo buduć pracavać na zadavalnieńnie mužčyn», — upeŭnienaja Iryna Sałamacina.
Cikava, što paśla filma ŭ zale praviali apytanku, chto b u Biełarusi chacieŭ uziać udzieł u takim samym prajekcie. Ruki padniali vielmi šmat ludziej, nie tolki dziaŭčaty, ale i chłopcy. Usie ich kantakty sabrali i paabiacali źviazacca, kali zdymki ŭ našaj krainie sapraŭdy raspačnucca.
Pradziusarka ž «Vieniery» padzialiłasia, što ŭ Danii pracujuć nad tym, kab, mahčyma, źniać padobnuju stužku i pra mužčyn.
Kamientary