U centry Bieraścia prajšła akcyja pratestu suprać budaŭnictva akumulatarnaha zavoda FOTA

Ludzi źbirajucca na centralnaj płoščy Bieraścia ŭžo treciuju niadzielu zapar. Jak i raniej, 11 sakavika jany nia razhortvali transparantaŭ i nia ahučvali łozunhaŭ. Udzielniki akcyi pratestu stajali hrupami, razmaŭlali i karmili hałuboŭ.

Aktyvist AHP Alaksandr Kabanaŭ, jaki taksama pryjšoŭ u niadzielu, nazvaŭ hetuju sustreču «mirnaj akcyjaj pratestu».

— Ludzi vyjšli vykazać svajo staŭleńnie da budaŭnictva akumulatarnaha zavoda. Siońnia [pryjšło ludziej] značna bolš, čym u minuły raz. Usie ŭžo adzin adnaho paznajuć, vitajucca, — raspavioŭ aktyvist.

Pavialičyć

Pratestoŭcy ahučyli płany sabracca na čarhovy mitynh i ŭ nastupnuju niadzielu. U hutarcy z žurnalistami Alaksandr Kabanaŭ vykazaŭ nadzieju na toje, što praz tydzień źbiarecca jašče bolš ludziej. Pa słovach surazmoŭcy, akcyi spyniacca, kali prypynicca budaŭnictva zavoda i pačniecca dyjałoh z aktyvistami.

— Zavod, moža, i pavinien być, ale nie tut, — pierakanany Alaksandr Kabanaŭ.

Žycharka Bieraścia Natalla prychodzić na płošču treciuju niadzielu zapar. U hutarcy z TUT.BY jana raspaviała, što zaniepakojena budaŭnictvam akumulatarnaha zavoda.

— Ja ŭpeŭniena, što hety zavod nie dadaść ekałahičnaści, čyścini našamu horadu. Napiaredadni 1000-hodździa Bieraścia heta samy drenny padarunak, jaki mahli zrabić našamu horadu, — padzialiłasia emocyjami Natalla.

Pavialičyć

Na pytańnie, jak doŭha jana hatovaja prychodzić na płošču ŭ znak pratestu, Natalla adkazała: «zaŭsiody».

— Da taho času, pakul nie zakryjuć hety zavod. Ja liču, što ničoha zahannaha my nie robim. My nie parušajem hramadzki paradak, łozunhaŭ nie pramaŭlajem. My chočam, kab ułady źviarnuli ŭvahu na našu zaniepakojenaść, — patłumačyła svaju pazicyju žančyna.

Pavialičyć

Naprykancy sustrečy aktyvisty inicyjavali zbor podpisaŭ pad zvarotam da haradzkich uładaŭ z prośbaj pravieści ŭ horadzie sankcyjanavany mitynh, pryśviečany pytańniu budaŭnictva zavoda.

A 13-j ludzi stali razychodzicca. Abyšłosia biez zatrymańniaŭ.

Raniej praciŭniki budaŭnictva akumulatarnaha zavoda vychodzili na płošču 4 sakavika i 25 lutaha. 

Budaŭnictva akumulatarnaha zavoda pačałosia na pramysłovaj placoŭcy «Aeraport» u svabodnaj ekanamičnaj zonie «Brest». Pytańniem budaŭnictva zaniepakojenyja žychary Bieraścia, niekalkich bližejšych viosak i sadovych tavarystvaŭ. Hałoŭnaje, što chvaluje ludziej, — heta acenka ŭździejańnia na navakolnaje asiarodździe. Adnak praviedzienaja da pačatku budaŭnictva ekśpiertyza pakazała, što «niehatyŭnaje ŭździejańnie prajektavanaha abjekta na atmaśfiernaje pavietra, pavierchnievyja i padziemnyja vody, nietry, hlebu, žyviolny i raślinny śviet, a taksama na čałavieka niaznačnaje», a «ŭvod prajektavanych abjektaŭ u ekspłuatacyju nie pryviadzie da parušeńnia pryrodna-antrapahiennaj raŭnavahi». Praciŭniki budaŭnictva staviać pad sumnieŭ hetyja vysnovy.

22 lutaha inicyjatyŭnaja hrupa padała ŭ Administracyju prezidenta zvarot z patrabavańniem prypynić budaŭnictva zavoda, pad jakim padpisalisia bolš za 36 tysiač čałaviek.

• 0
• 0
• 0
• 0
• 0
• 0
• 0
• 0