«Tavaryš Karpienka, a ci viadoma Vam, z čaho lubimyja Vami finy pačynali?» Adkaz astranoma Małyščyca ministru adukacyi sabraŭ sotni vodhukaŭ

66 repostaŭ u adnym fejsbuku, sotni łajkaŭ i vodhukaŭ — ludzi masava abmiarkoŭvajuć dopis vykładčyka astranomii i papularnaha fatohrafa Viktara Małyščyca pra čarhovyja reformy ŭ adukacyi. Prapanujem jaho i vašaj uvazie.

Pavialičyć

Pračytaŭ siońnia, što naš ministr adukacyi Karpienka «fanacieje ad finskaj i estonskaj madeli». Aha, prachodzili my ŭžo heta. U nas tut mnohija fanaciejuć ad roznych zachodnich madelaŭ. Tolki niejak pa-svojmu fanaciejuć. Naprykład, ź sistemy ŽKH nam treba pieraniać tolki 100% apłatu pasłuh, ź miedycynskaj śfiery — tolki płatnuju miedycynu, a z «finskaj madeli» — tolki likvidacyju himnazij.

Tavaryš Karpienka, a ci viadoma Vam, z čaho horača lubimyja Vami finy pačynali? Z hihanckich układańniaŭ u abstalavańnie škoł, z rezkaha pavyšeńnia zarobkaŭ nastaŭnikaŭ, ź pierapadrychtoŭki ŭžo pracujučaha piersanału.

Ciapier u Finlandyi sapraŭdy niama sensu šukać lepšaje miesca dla dziciaci — u luboj škole krainy možna atrymać jakasnuju adukacyju ad sapraŭdnych prafiesijanałaŭ hetaj spravy.

Pierad tym, jak pravodzić svaju hienijalnuju reformu, Vy, napeŭna, surjozna ŭkłalisia ŭ asnaščeńnie škoł? Nie, u mnohich ź ich dośledy pa fizicy i chimii pakazvajuć ź Jutuba, bo niama ni abstalavańnia, ni reaktyvaŭ. A ramonty i zakupka asnoŭnych rečaŭ uvohule adbyvajucca za hrošy baćkoŭ.

Moža, Vy niejak paśpieli pavysić kvalifikacyju nastaŭnikaŭ, tamu ciapier u kožnaj škole budzie vykładańnie na najvyšejšym uzroŭni? Dy nie. Ja sam nastaŭnik, i pa maim pradmiecie (astranomija) mnie chopić palcaŭ ruk, kab pieraličyć nastaŭnikaŭ Minska, jakija viedajuć svoj pradmiet choć krychu hłybiej školnaj prahramy. Ź inšymi, bolš papularnymi, pradmietami situacyja lepš, ale nienašmat. Ach, dyk Vy, napeŭna, padniali zarobki razoŭ u 5, i ŭ bližejšy čas talenavityja nastaŭniki sami nabiahuć zapoŭniać usie škoły da apošniaj? Kaniešnie, nie —

ciapier małady śpiecyjalist biez rehalij, jaki pracuje na staŭku, atrymlivaje rubloŭ 300-400. Z takim zarobkam Vy nie nabieracie nastaŭnikaŭ-prafiesijanałaŭ na ŭsie škoły Biełarusi.

Dobra, moža Vy vyrašyli pačać chacia b z małoha?

Admianili prymusovuju padpisku na dziaržaŭnuju presu? Pierastali adpraŭlać dziaciej z urokaŭ na ŭborku ŭradžaju?

Pierastali naviešvać na nastaŭnikaŭ nie ichnija abaviazki? Aha, skažacie Vy, chren vam, a nie admienu hetaj bzdury.

Heta ŭ nas takaja finskaja madel. Nie zabudźciesia tolki padpisać škołu na «Kommunist Biełarusi» i inšyja saŭbiełki.

Chutka 7 listapada. Vaźmicie ŭsich svaich «Kommunistaŭ Biełarusi», prykarytnych łazutkinych i łabyźnicie svajho łysaha istukana na płoščy la ministerstva. Pa-mojmu, heta adzinaje, što dobra ŭmiejuć kamunisty. A vyrašać prablemy adukacyi dazvolcie tym, chto ich umieje bačyć. Zapytajciesia chacia b u tych samych finaŭ, jak heta zrabić.

• 1
• 0
• 0
• 0
• 0
• 0
• 0
• 0