Vice-premjer Žarko vystupiŭ za admienu ŭstupnych ekzamienaŭ u 5-ja kłasy himnazij

Vice-premjer Biełarusi Vasil Žarko na sustrečy ŭ Ministerstvie adukacyi vykazaŭsia ab admienie ŭstupnych ekzamienaŭ u 5-ja kłasy himnazij, paviedamili BIEŁTA ŭ pres-słužbie Ministerstva adukacyi.

U Ministerstvie adukacyi z udziełam vice-premjera, ministra adukacyi Ihara Karpienki, pradstaŭnikoŭ abłasnych upraŭleńniaŭ adukacyi, dyrektaraŭ škoł i himnazij respubliki abmiarkoŭvalisia miechanizmy realizacyi kancepcyi raźvićcia sistemy ahulnaj siaredniaj adukacyi na bližejšy čas.

U pryvatnaści, razhladałasia pytańnie ab admienie ŭstupnych ekzamienaŭ u 5-ja kłasy himnazij, ab pracoŭnym i profilnym navučańni, ab niezaležnym ekzamienie za kurs bazavaj škoły.

«Nieabchodna ŭsim razam abmierkavać, a potym vyrazna adpracavać usie pazicyi pa hetych pytańniach, — adznačyŭ Vasil Žarko. — Siońnia dzieci, jakija pastupajuć paśla čaćviortaha kłasa ŭ himnazii, atrymlivajuć stres i nie razumiejuć, navošta im heta treba. Ja liču, što dzieci pavinny mieć roŭnyja ŭmovy dla atrymańnia adukacyi. Dla ahulnaj siaredniaj adukacyi taksama aktualnaja prablema niedastatkovaha pracoŭnaha vychavańnia. Hetyja pytańni nie pavinny vypadać z pola hledžańnia baćkoŭ i piedahohaŭ».

Pa słovach vice-premjera, ŭroki pracy patrebnyja ŭ škole.

«U naš čas pry škołach byli vučebna-vytvorčyja kambinaty. My z zadavalnieńniem chadzili i atrymlivali rabočuju prafiesiju. Pracoŭnaje navučańnie spryjaje farmavańniu navykaŭ i ŭmieńniaŭ, nieabchodnych ŭ darosłym žyćci, vychoŭvaje pavahu da ludziej rabočych prafiesij. Pavinna być ŭsiebakovaje raźvićcio dziciaci, i pracoŭnaje vychavańnie - adzin z elemientaŭ adukacyjnaha pracesu», — padkreśliŭ jon.

Jakaść adukacyi, na dumku Ihara Karpienki, nie pavinna vymiaracca vynikami CT abo «zapavietnym miescam u himnazii». Jana pavinna aceńvacca pa ŭzroŭni indyvidualnaha i sacyjalnaha raźvićcia kožnaha vučnia. Treba adkarektavać strukturu sistemy adukacyi. Jak vid ustanovy himnazija zachavajecca.

«Jana budzie realizoŭvać prahramu pačatkovaj, bazavaj i ahulnaj siaredniaj adukacyi, pry hetym ab pavyšanym uzroŭni my pavinny vieści razmovu ŭ dačynieńni da 10-11 kłasach», — miarkuje Ihar Karpienka. Taksama detalovaj prapracoŭki patrabuje pytańnie ab niezaležnym ekzamienie za kurs bazavaj škoły.

Ministerstvam sumiesna z kiraŭnikami ŭstanoŭ adukacyi, piedahohami buduć prapracavany ŭsie hetyja pytańni i tolki paśla hetaha pryniaty adpaviednyja rašeńni.

• 0
• 0
• 0
• 0
• 0
• 0
• 0
• 0