«Niezaležny ekzamien paśla 9 kłasa»: čynoŭniki abmiarkoŭvajuć praviły pryjomu ŭ himnazii
Ministerstva adukacyi vyrašaje, jakimi buduć ustupnyja ekzamieny ŭ himnazii. «Mahčyma, heta budzie niezaležny ekzamien paśla 9 kłasa, mahčyma, rašeńnie budzie inšym», — paviedamiła namieśnik ministra adukacyi Raisa Sidarenka padčas anłajn-kanfierencyi na sajcie Biełteleradyjokampanii.
— Havorka idzie pra toje, što siońnia, kali dzicia pastupaje ŭ 5-y kłas himnazii, heta nie jaho vybar nieabchodnaści vyvučeńnia pradmietaŭ na pavyšanym uzroŭni, a chutčej za ŭsio, žadańnie baćkoŭ. Časam žadańnie, časam ambicyi, — raspaviała Raisa Sidarenka. — Tamu siońnia my havorym ab metazhodnaści praviadzieńnia hetych ekzamienaŭ mienavita pierad pastupleńniem u 5 kłas. Imavierna, ich treba pieranieści na inšy etap, kali dzieci śviadoma razumiejuć, buduć jany vyvučać na pavyšanym uzroŭni fiziku abo fiłałohiju, što im bolš prymalna, zrazumieła, cikava, ź pierśpiektyvaj na dalejšaje navučańnie ŭ VNU.
Pa słovach namieśnika ministra, «heta pytańnie abmiarkoŭvajecca, jakoje budzie rašeńnie pryniata, u bližejšy čas my daviadziom da ŭsich hetuju infarmacyju».
Adzin z varyjantaŭ, jaki ciapier abmiarkoŭvajecca, — u himnaziju buduć zaličvacca pa vynikach niezaležnaha ekzamiena. Jon zamienić ciapierašnija ekzamieny, jakija zdajuć dzieviacikłaśniki — prymać jaho buduć piedahohi, jakija nie pracujuć u škole, dzie vučycca dzicia.
— Kali ŭ ciabie nie nižej za 7 ci 8, to ty možaš iści ŭ himnaziju, — patłumačyła Raisa Sidarenka. — Mahčyma, tak. Mahčyma, rašeńnie budzie inšym.
Namieśnik ministra ŭpeŭnienaja, što «ispyty ŭ 5 kłas himnazii i čas ich praviadzieńnia nie stanoviacca harantyjaj, što dzieci, jakija zdajuć ich na 9 i 10, u 7-m kłasie nie stanuć atrymlivać zusim inšyja adznaki». Akramia taho, u ministerstvie ličać «vielmi niapravilnym», što ŭ 4 kłasie škoły na ŭrokach ruskaj, biełaruskaj, matematyki časam zajmajucca nie pa padručniku, a rychtujucca da pastupleńnia ŭ himnaziju.
Pra toje, što ŭ krainie treba mianiać sistemu pastupleńnia ŭ himnazii, zajaviŭ ministr adukacyi Ihar Karpienka, pradstaŭlajučy na respublikanskaj piedradzie kancepcyju raźvićcia adukacyi.
Kamientary