U bresckaj dziciačaj balnicy pamierła niekalki dziaciej — siamja raspaviała padrabiaznaści
Jak stała viadoma «Našaj Nivie», letam u Bresckaj abłasnoj dziciačaj balnicy było zafiksavana niekalki dziciačych śmierciaŭ.
Niekatoryja baćki nie majuć pretenzij da daktaroŭ i kažuć, što suprać losu nie pojdzieš.
Inšyja — prynamsi, adna siamja, — vinavaciać daktaroŭ u abyjakavaści dy nieprafiesijanaliźmie i nastrojeny iści da kanca.
Jak minimum pa adnym fakcie śmierci ŭ dadzieny momant pravodzicca śledčaja pravierka — zajavu padała siamja Doŭhaniaŭ: u ich u hetaj balnicy ŭ pieršyja dni žniŭnia pry niezrazumiełych abstavinach pamierła 11-miesiačnaja dačka.
Voś jak nam apisała situacyju jaje maci, Łarysa Doŭhań:
«Pry kancy lipienia ŭ Jevy padniałasia tempieratura da 38 hradusaŭ. Preparaty, što vypisała terapieŭt, nam nie dapamahli. Tempieratura trymałasia. Praz paru dzion my vyklikali chutkuju. U balnicy pravieryli na encefalit, mieninhit, pnieŭmaniju: ničoha nie paćvierdziłasia. Praz toje, što dzicia naradziłasia niedanošanym, my vyrašyli nie pakidać jaje ŭ balnicy — kab vyklučyć ryzyku dadatkovaj infiekcyi. Doktar pryjomnaha adździaleńnia vypisaŭ antybijotyk «Sumamied» u siropie, ale jaho ŭ aptekach horada nie było. Ranicaj nastupnaha dnia my vyklikali svajho terapieŭta, kab vypisać recept na anałah — jon ža nastojvaŭ na špitalizacyi».
Dalej, śćviardžaje žančyna, pačaŭsia «treš»:
«Pryjechali ŭ balnicu. Ja papiaredžvała miedykaŭ, što ŭ dziciaci hłyboka schavanyja vieny, što katetar budzie ciažka pastavić. Jany ž paŭtary hadziny katavali dzicia — hety čas Jeva była biez vady, ale z pryniatymi žarapanižajučymi, — i tolki kali pačalisia nienaturalnyja vyhibańni cieła, zakatvańnie vačej, dziciaci ŭrešcie pastavili katetar u jaremnuju vienu. Hetaj kropielnicaj źbili tempieraturu z 39,8 da 38. Paśla da nas u pałatu pakłali darosłuju žančynu z tempieraturaj i horłam. Heta jak? U dziciaci pačalisia sutarhi, ale daktary kazali, što heta reakcyja na prarezvańnie zuboŭ. Ranicaj nastupnaha dnia pačała zapadać hrudzina pry dychańni, na poście reanimacyjnaha adździaleńnia nie było doktara. Paśla maich krykaŭ doktar znajšoŭsia, vyrašana było padklučyć aparat vientylacyi lohkich, a mianie adpravili dadomu. Pa telefonie nie adkazvali pra miery lačeńnia — što ŭ hety čas było z dačkoj, ja nie viedaju. Praz dva dni mianie vyklikali dla dalejšaha dohladu. Heta byŭ šok. U Jevy na hałavie byŭ proležań, jana lažała ŭ kałavych masach — u adpaviednych miescach na ciele pałopałasia skura (tut siamja prosić padkreślić, što proležań utvaryŭsia ŭ reanimacyjnym adździaleńni bresckaj abłasnoj balnicy)».
«Ja taksama pakidała ceły śpiektr dziciačaha charčavańnia, ale joj ničoha z hetaha nie dali — karmili balničnaj hrečkaj. Katetar nie mianiali — jon pačaŭ trambavacca. My prasili pra pieravod u Minsk u centr «Maci i dzicia», ale nam adkazvali, maŭlaŭ, tam niama miescaŭ i budzie takoje ž samaje lačeńnie. Ale jakoje lačeńnie? Nam davali «Ibuprafien», śviečy «Cefiekon» i zrabili lityčnuju injekcyju. Chirurh da nas nie pryjšoŭ — ja sama z dačkoj padymałasia da jaho na piaty dzień, kab źniać švo ad hidratoraksa. Na šostyja sutki zaprasili dziažurnaha reanimatołaha Snarskaha, jaki, urešcie, paćvierdziŭ fakt sutarhaŭ. Na prośby ich kupiravać doktar adździaleńnia nie reahavaŭ. Zahadčyca adździaleńnia praciahvała lačeńnie žarapanižajučymi, mianiajučy preparaty i daziroŭki. Kančatkovaha dyjahnazu da hetaha času nie było, tolki pracoŭnaja viersija — encefalit. Paśla čarhovaha kansiliumu byŭ pryznačany «Dapakin» dla źniaćcia sutarhaŭ. Praź dzień u dziciaci pačaŭsia flebit, jaho pieraviali ŭ reanimacyju. Kali ž my ŭrešcie nastajali na pieravodzie ŭ Minsk, to reanimatołah paviedamiŭ nam, što pieravod naŭrad ci adbudziecca, bo pačaŭsia aciok lohkich. Dačka pamierła. Jana miesiac hareła ad tempieratury, biez adpaviednaha lačeńnia abo pieravoda da bolš kampietentnych śpiecyjalistaŭ», — raskazała nam žančyna.
Zhadanyja joj proźviščy daktaroŭ niervova ŭsprymali inšyja ludzi, ź jakimi my źviazalisia. Ale mała chto bolš zachacieŭ afišavać siabie i raskazvać akaličnaści znachodžańnia svaich dziaciej u balnicy.
«Heta prosta šok. My taksama tam ledź nie zhubili dzicia: hetak ža abyjakava pastavilisia da nas, nie było dyjahnazu. Ale Boh, vidać, dapamoh pieravieścisia ŭ Minsk. Tam vylečyli. Čuju historyju Doŭhaniaŭ i žachajusia, što i ŭ nas tak usio mahło skončycca», — skazała nam jašče adna maci, Jaŭhienija.
Zahadčyca infiekcyjnaha adździaleńnia Bresckaj abłasnoj dziciačaj balnicy Taćciana Palijčuk admoviłasia ad kamientaroŭ, skazaŭšy, što nie pradastaŭlaje statystyku pa śmiarotnaści i nie interpretuje jaje.
«Pošukam adkazaŭ na vašyja pytańni zajmajucca śledčyja, bolš nie mahu ničoha dadać», — skazała Palijčuk.
Jak paviedamili «Našaj Nivie» ŭ Śledčym kamitecie, viedamstva pravodzić pravierku pa dźviuch śmierciach u Breście.
«Bresckim mižrajonnym adździełam Śledčaha kamiteta Respubliki Biełaruś pravodzicca pravierka pa zajavie ad 23 žniŭnia 2017 hoda žycharki h. Bresta, 1978 hoda naradžeńnia, ab praviadzieńni razhladu pa fakcie śmierci 17 žniŭnia 2017 hoda ŭ reanimacyjnym adździaleńni Bresckaj dziciačaj abłasnoj balnicy jaje małaletniaj dački, 2016 hoda naradžeńnia. Vyjaŭlena, što 27 lipienia 2017 hoda ŭ dziaŭčynki pavysiłasia tempieratura da 39 hradusaŭ, u suviazi z čym jana była špitalizavanaja ŭ balnicu, dzie paźniej pamierła.
Taksama 15 žniŭnia 2017 hoda ŭ terytaryjalnaje padraździaleńnie pastupiła zajava pa fakcie śmierci dziaŭčynki, 2016 hoda naradžeńnia, jakaja pamierła 29 červienia 2017 hoda ŭ Bresckaj abłasnoj balnicy. Dzicia było špitalizavanaje va ŭstanovu achovy zdaroŭja 22 červienia 2017 hoda.
Pravavaja acenka dziejańniam piersanału ab charaktary akazańnia miedycynskaj dapamohi budzie dadzienaja pa zaviaršeńni kompleksu pravieračnych mierapryjemstvaŭ i ekśpiertnych daśledavańniaŭ, nakiravanych na vyśviatleńnie ŭsich pryčyn i ŭmoŭ, jakija paciahnuli za saboj hibiel dziaciej», — raspaviała aficyjny pradstaŭnik USK pa Bresckaj vobłaści Maryna Drańkova.
Ciapier čytajuć
Łukašenka zajaviŭ pra hatoŭnaść pryjechać u Kijeŭ32
Kamientary