Žurnalistu «Ukrainskaj praŭdy» Aksanie Kavalenka zabaronieny ŭjezd na terytoryju Biełarusi. Pra heta napisała ŭ Fejsbuku sama Kavalenka.
«Siońnia nočču na punkcie propusku Ciarucha biełaruskija pamiežniki źniali mianie ź ciahnika Kijeŭ - Minsk i paviedamili, što mnie zabaronieny ŭjezd u Biełaruś», - raspaviała žurnalist. Pavodle jaje słoŭ, pamiežniki admovilisia patłumačyć pryčynu zabarony. Adnak sama Kavalenka zmahła ŭbačyć na manitory, što inicyjataram zabarony źjaŭlajecca RF.
«I jak mnie paviedamiŭ biełaruski pamiežnik, pakolki Rasieja i Biełaruś źjaŭlajucca «sajuznymi dziaržavami», to mnie zabaronieny ŭjezd jak u RF, tak i ŭ Biełaruś», - adznačyła Kavalenka.
«Pamiežniki vyviali mianie z kupe, apytali mianie pra metu majho padarožža, kali ja apošni raz była ŭ RF i Biełarusi, čamuści sfatahrafavali mianie, pry hetym spasłaŭšysia na niejki zahad, jaki nie zmahli pakazać. A potym źniali mianie ź ciahnika i praź niejki čas pasadzili na ciahnik, jaki ruchaŭsia ŭ Kijeŭ», — raspaviała Kavalenka.
Pavodle jaje słoŭ, nijakich dakumientaŭ ab zabaronie ŭjezdu i terminie jaho dziejańnia žurnalistu nie dali, a tolki pastavili adpaviedny štamp u pašparcie.
«U Minsku prachodziać pieramovy pamiž Ukrainaj i RF pa Danbasie, tamu dziŭna, čamu Biełaruś jak kraina nibyta miratvorac zabaraniaje ŭjezd ukrainskim žurnalistam. Tamu što ja ŭpeŭnienaja, što ŭjezd u RF i ŭ Biełaruś mnie zabaronieny mienavita z-za žurnalisckaj dziejnaści», - padkreśliła Kavalenka.
Razam z tym pieršy vice-śpikier Iryna Hieraščanka u kamientary pad postam Kavalenki ŭ Facebook paviedamiła, što pasolstva Ukrainy ŭ Biełarusi rychtuje notu ab zabaronie ŭjezdu žurnalista.
«Našy dziejańni rehłamientavanyja dziejučym zakanadaŭstvam - a mienavita artykułam 30 Zakona Respubliki Biełaruś ab pravavym stanoviščy zamiežnych hramadzian i asob biez hramadzianstva ŭ Respublicy Biełaruś», - rastłumačyli tut.by u Dziaržpahrankamitecie Biełarusi.
Biełaruś i Rasija ratyfikavali pahadnieńnie ab abmienie i faktyčnym abjadnańni śpisaŭ nieŭjaznych u kancy 2015 hoda. Kožnaja kraina składaje svoj śpis samastojna. U nas za ŭžyvańnie čornaha śpisu na praktycy adkazvajuć KDB, Dziaržpahrankamitet i MUS. Pahadnieńnie zaklučyli, kab zamiežniki nie mahli skarystacca adkrytaj miažoj pamiž Biełaruśsiu i Rasijaj, kab trapić u tuju z krain, dzie ich paličyli niepažadanymi.
Ciapier čytajuć
«Uźnikajuć ujaŭleńni, što palitviaźni musiać być stojkimi, sabranymi, udziačnymi. A realnaść roznaja». Pahavaryli ź ludźmi, jakija vodziać departavanych litaralna za ruku66
Kamientary