Ruch «Za svabodu» patrabuje admovicca ad supolnaha z Rasijaj «čornaha śpisu» na ŭjezd
Zajava ruchu «Za svabodu» z nahody departacyi ź Biełarusi paeta Siarhieja Žadana.
Haniebnaje zatrymańnie ŭ Minsku i zabarona na ŭjezd u Biełaruś talenavitamu ŭkrainskamu paetu Siarhieju Žadanu čarhovy raz krasamoŭna pakazała abmiežavanaść sapraŭdnaha palityčnaha suvierenitetu Biełarusi ŭ ramkach hetak zvanych intehracyjnych strukturaŭ z Rasijaj, paviedamlaje pres-słužba ruchu.
Niahledziačy na ŭsie hučnyja zajavy kiraŭnika dziaržavy, biełaruskaje kiraŭnictva ŭ čarhovy raz dakazała svaju palityčnuju niesamastojnaść. Adna sprava — na publiku zaciata krytykavać kiraŭnikoŭ asobnych rasijskich viedamstvaŭ, i zusim inšaja — ślepa nasupierak nacyjanalnym intaresam vykonvać pastanovy inšaha rasijskaha viedamstva.
Situacyja, kali ŭkrainskija hramadzianie, kab naviedać Biełaruś, pavinny pytacca dazvołu ŭ Maskvy — źjaŭlajecca pierakanaŭčym dokazam taho, što ŭ ramkach «intehracyjnych» strukturaŭ Biełaruś hublaje nie tolki palityčny suvierenitet, ale i imidž mirnaj i haścinnaj krainy. Biełaruś stanovicca zakładnikam avanturnaj impierskaj palityki Maskvy, jaje supraćstajańnia z susiedziami i demakratyčnych śvietam.
Ruch «Za Svabodu» vykazvaje abureńnie zabaronaj na ŭjezd u Biełaruś Siarhieju Žadanu. My zaklikajem biełaruskija ŭłady terminova admianić hetuju zabaronu, a taksama prynieści prabačeńni viadomamu ŭkrainskamu piśmieńniku.
My patrabujem, kab Biełaruś pravodziła całkam samastojnuju vizavuju palityku. Rasijski śpis nieŭjaznych nie pavinien mieć nijakaha dačynieńnia da našaj krainy. Tolki biełaruskaja dziaržava moža i pavinna vyrašać, kaho varta ŭpuskać, a kaho nie ŭpuskać na terytoryju Biełarusi.
Kamientary