Z 5 studzienia avijakampanija «Biełavija» źmianiła padychod da charčavańnia na borcie. Ciapier pasažyraŭ kormiać na ŭsich rejsach.
Racyjon zaležyć ad taho, lacić pasažyr rejsam da 1,5 hadziny ci bolš.
— Sapraŭdy, u nas była dosyć ścipłaja prapanova, — pahadziŭsia hiendyrektar avijakampanii Anatol Husaraŭ. — My paličyli ŭsio ž taki nieabchodnym i metazhodnym zrezać vydatki pa inšych napramkach, ale arhanizavać bolš jakasnaje absłuhoŭvańnie pa bartavym charčavańni. I my ŭžo bačym, što pasažyry pryjemna ździŭleny.
Na sajcie avijakampanii ciapier pravodzicca apytańnie pa bartavym charčavańni. Kožny pasažyr moža acanić jaho jakaść i ŭnieści svaje prapanovy.
«Biełavija» adznačaje, što viarnuć charčavańnie na ŭsich rejsach było b składana, kali b nie źnižeńnie niekalki hadoŭ tamu cany na paliva.
— Kali b cana na paliva była jak 2-3 hady tamu, kali my praktyčna admovilisia ad bortacharčavańnia, jak i mnohija inšyja avijakampanii, to, viadoma, hetaha b zrabić nie ŭdałosia. Da taho ž, syhrali svaju rolu damoŭlenaści ź niekatorymi aeraportami pa źnižeńni aeraportavych zboraŭ, — patłumačyŭ Anatol Husaraŭ.
Kiraŭnik bortpravadnikoŭ kampanii Siarhiej Łatuškin raspavioŭ ab mieniu, jakoje siońnia prapanujuć na rejsach «Biełavija». Pry palocie na termin da 1,5 hadziny — albo sendvičy, albo miasnyja narezki, rybnyja zakuski i harodnina. Plus čaj-kava, vada-soki.
Na rejsach bolš za paŭtary hadziny — haračaje charčavańnie (miasa, abo ryba, abo ptuška i harnir). Plus soki-vada, kava-harbata.
Mieniu biźnies-kłasa praduhledžvaje pastajannaje haračaje charčavańnie niekalkich vidaŭ — heta rybnyja abo miasnyja nabory. Rybnaja strava dla biźnies-kłasa - heta čyrvonaja ryba, harnir, rybnyja zakuski — ikra ci krevietki. Miasnaja — śvinina, albo jałavičyna, albo cialacina i harodnina. U biznes-kłasie taksama prapanujuć ałkahol.
Pa słovach pradstaŭnikoŭ kampanii, sendvičy plus napoj na borcie abychodziacca «Biełavija» ŭ 2,5 rubla. Chałodnyja zakuski plus napoj — kala 6 rubloŭ, haračaje charčavańnie i napoj — 10-12 rubloŭ. Rybnaje mieniu ŭ biznes-kłasie kaštuje 22 rubli, miasnoje — 19.
Avijakampanija śćviardžaje, što viarnuć charčavańnie na borcie ŭdałosia biez pavieličeńnia cenaŭ na kvitki.
Ciapier čytajuć
Kupla kvatery praz kaapieratyŭ zamiest ipateki: jak pracuje sistema, padobnaja da piramidy, i što kažuć udzielniki i ekśpiert3
Kamientary