Žurnalisty «NN» pabyvali ŭ tajamničaj rezidencyi pad Radaškovičami FOTY
Sa staronak biełaruskich ŚMI nie sychodzić tema tajamničaj siadziby, jakuju žurnalisty znajšli ŭ lesie pad Radaškovičami. Telekanał «Biełsat» paličyŭ jaje rezidencyjaj Łukašenki, partał Tut.by nazvaŭ votčynaj rasijskaha aliharcha Michaiła Huceryjeva.
Kab razabracca ŭ situacyi, karespandenty «NN» źjeździli ŭ radaškovicki les i pastaralisia znajści adkazy na niekalki hałoŭnych pytańniaŭ.
1. Što ŭjaŭlaje ź siabie rezidencyja?
Siadzibu «Krasnasielskaje», što mieścicca za 40 kiłamietraŭ ad Minska na bierazie raki Udra, chavaje ad vačej bałocisty les. La pavarotu na «Krasnasielskaje» staić znak «Ujezd zabaronieny». Adsiul da płota, što aharodžvaje terytoryju 11 hiektaraŭ, jašče z kiłamietr.
La samych varot staić achova z sabakam, uzdoŭž aharodžy — kamiery videanazirańnia. Nijakaha budaŭničaha pašpartu abjekta tut, viadoma, niama.
Karespandenty «NN» zajšli za płot, ale dalej ich nie puścili: maŭlaŭ, «pryvatnaja terytoryja».
Dyrektar siadziby Andrej Anatoljevič, jak da jaho źviarnuŭsia kaleha, skazaŭ «NN», što budaŭničyja raboty praciahvajucca. Pavodle jaho słoŭ, u repartažy «Biełsata» praŭdy — 10%. Maŭlaŭ, nijakaha Bierazoŭskaha tut nikoli nie było.
Pa infarmacyi Tut.by, na bierazie voziera pabudavanyja trochpaviarchovy hatel i try žyłyja damy. «Tam jość basiejn, łaźni, tenisnyja korty, korpus dla prysłuhi, viertalotnaja placoŭka», — udakładniaje «Biełsat».
2. Kamu naležyć siadziba?
Zamiežniki nie mohuć vałodać ziamloj, tamu jaje biaruć u arendu. Damova pamiž Respublikaj Biełaruś i zamiežnym budaŭničym unitarnym pradpryjemstvam «SiertusAvija» była zaklučanaja ŭ červieni 2012 hoda terminam na 100 hadoŭ.
Što takoje «SiertusAvija»? Aktyŭnaść hetaj kampanii ŭ Biełarusi była źviazanaja z budaŭnictvam anhara ŭ aeraporcie «Minsk-2». Krynicy Tut.by paviedamlajuć, što jana źviazanaja z asobaj rasijskaha aliharcha Michaiła Huceryjeva.
Heta miljarder, jaki siabruje z Alaksandram Łukašenkam. Jamu naležać minski hatel «Reniesans», kampanii «Słaŭkalij» i «Słaŭnafta».
Miascovyja čynoŭniki ŭ jakaści kantaktnaj asoby «SiertusAvija» nazyvajuć Siarhieja Fiodaraviča Łapcionka, poŭnaha ciozku top-mieniedžara «Słaŭnaftachima».
A voś budynki na terytoryi rezidencyi naležać kiprskaj afšornaj kampanii. «Błatbierh Chołdynhs Limited» ź Nikasii vykupiła jaje ŭ 2012 hodzie. Pryčym pradaŭcami byli razam «SiertusAvija» i «Dypsiervis».
«Dypsiervis» — arhanizacyja, u abaviazki jakoj uvachodzić zabieśpiačeńnie dziejnaści najvyšejšych słužbovych asobaŭ, u tym liku prezidenta. Bolšaść rezidencyj Alaksandra Łukašenki naležyć mienavita «Dypsiervisu». Kampanija ŭhodu nie kamientuje.
3. Pry čym tut Łukašenka?
Miascovyja žychary raskazvajuć, što ŭ siadzibu čaściakom naviedvajucca rasijanie, a časam adpačyvaje i Alaksandr Łukašenka. Naprykład, pryjazdžaŭ u minułuju subotu, 14 studzienia. U toj ža dzień, kažuć, pajechaŭ nazad. Usio sychodzicca — u niadzielu Łukašenka palacieŭ u Jehipiet.
«U hetuju subotu pryjazdžaŭ. Usio ačapili, na darohu nie vyjści, tolki ŭ dvor, — kaža viaskoviec u susiednim Daŭboravie. — Byvaje tut pieryjadyčna, pryjazdžaje raz na miesiac».
Nibyta Łukašenka sustrakaŭ tut Novy hod — miascovyja zapomnili šykoŭny fiejervierk.
Miascovyja siadzibaj cikaviacca, časam vypraŭlajucca na špacyr pahladzieć, što tam adbyvajecca.
Žycharoŭ u navakolli mała, pieravažna adny dačniki, jakija zimoj tut nie byvajuć. Najbližejšaje bolš-mienš ažyŭlenaje miastečka — Šaršuny, što za siem kiłamietraŭ ad «Krasnasielskaha». Šaršunoŭcy taksama nie raz bačyli kartež kiraŭnika krainy, jaki nakiroŭvaŭsia ŭ bok «Krasnasielskaha».
«Vielmi niapravilna, što adharadzili ŭsich ludziej i nie dali mahčymaści pajści pakupacca i adpačyć, čysta pa-čałaviečy», — skazaŭ adzin z žycharoŭ miastečka «Biełsatu».
4. Što ad hetaha maje Biełaruś?
Ahulnaja suma, za jakuju kipryjoty i rasiejcy nabyli siadzibu, nieviadomaja. Ale adna tolki draŭlanaja łaźnia płoščaj mienš za 50 m2 kaštavała $1,04 miljona.
Što da arendy ziamli, to biudžet atrymlivaje simvaličnuju płatu. Štomiesiac «SiertusAvija» płacić za arandavanyja hiektary… 131,6 rubla, heta kala $67,5 u ekvivalencie.
Varta zhadać jašče niekalki pracoŭnych miescaŭ, u siadzibie pieravažna pracujuć miascovyja žychary.
5. I pry čym tut Bierazoŭski?
Miascovyja žychary raskazvajuć, što, raniej na miescy siadziby «Krasnasielskaje» byŭ sanatoryj, jaki naležyŭ tavarystvu palaŭničych. Tady ž i stvaryli vadaschovišča, jakoje dazvalali naviedvać miascovym žycharam. Naprykancy 90-ch sanatoryj zbankrutavaŭ, i terytoryja adyšła va ŭłasnaść dziaržavy.
Paśla nibyta źjaviŭsia inviestar — Barys Bierazoŭski. Žychary bližejšych viosak upeŭnienyja, što raniej rasijski biznesmien chavaŭsia ŭ siadzibie.
U 2013 hodzie časopis Forbes pisaŭ, što ŭ Biełarusi Barysa Bierazoŭskaha z samalota «sustrakała mašyna z «mihciełkaj», i ŭ supravadžeńni achovy jon jechaŭ u rezidencyju ŭ Radaškovičach pad Minskam». «Jon tam pabudavaŭ sabie viosku i kajfavaŭ. Biarozy, ruskija žančyny, śviežaje maroziva pa 20 kapiejek, čorny chleb. Jon adčuvaŭ siabie na radzimie», — raspaviadaŭ časopisu siabar Bierazoŭskaha.
Ciapier čytajuć
U Šejmana znajšli jašče adnu mahčymuju kachanku i syna. Sakratarka biez vyšejšaj adukacyi za ličanyja hady stała ŭłaśnicaj raskošnych damoŭ i handlovaha centra4
U Šejmana znajšli jašče adnu mahčymuju kachanku i syna. Sakratarka biez vyšejšaj adukacyi za ličanyja hady stała ŭłaśnicaj raskošnych damoŭ i handlovaha centra
«Što, hrochnuć dziaciej Cichanoŭskaj, kab źviarnuli ŭvahu na maju prablemu?» Jak tupy kamientar aktyvista Dzianisa Daškieviča stvaryŭ jamu prablemy ŭ Polščy2929
Kamientary