Rasijskija ŚMI znoŭ abvinavačvajuć Uładzimira Makieja ŭ padrychtoŭcy pieravarotu
Na sajcie EurAsia Daily źjaviŭsia analityčny artykuł dyrektara centra pa pracy z vypusknikami Vyšejšaj škoły ekanomiki (Maskva) Dźmitryja Bałkunca «Jak dziejnaść kiraŭnika MZS Biełarusi ŭpłyvaje na adnosiny Minska i Maskvy».
Možna skazać, što ŭ rasijskaj presie praciahvajecca sieryja ačarnialnych materyjałaŭ u dačynieńni da Uładzimira Makieja. Jašče letam šef-redaktar «Rehnuma» Juryj Barančyk pisaŭ, što Makiej rychtuje Majdan na vulicy Zybickaj.
Bałkuniec u svaich mierkavańniach pajšoŭ śledam za starejšym tavaryšam Barančykam. «Jość padstavy mierkavać, što pry ŭdziele Makieja viadziecca płanamiernaja rabota pa niekanstytucyjnaj źmienie ŭłady ŭ respublicy pa ŭkrainskim scenary», — ličyć ekśpiert. Na čym hruntujecca takaja vysnova? Usio vielmi prosta: Makiej — ministr zamiežnych spravaŭ, a Parašenka zajmaŭ takuju samuju pasadu va Ukrainie.
«Dziejańni Uładzimira Makieja nie tolki nanosiać škodu rasijska-biełaruskim adnosinam, ale i ŭvodziać u zman jeŭrapiejskich partnioraŭ Biełarusi. Respublika vystaŭlajecca ŭ roli žabraka i paśmiešyšča, a jaje źniešniaja palityka nosić destruktyŭny charaktar», — rubić Bałkuniec.
Vialikaje abureńnie maskoŭskaha palitołaha vyklikaje toj fakt, što ciapier viaducca pieramovy pra ŭznaŭleńni pracy pasolstva ZŠA ŭ Minsku. Jak bačym, kahości prynamsi ŭ Maskvie vielmi niervujuć hetyja pieramovy.
Dźmitryj Bałkuniec zajaŭlaje, što tolki za śniežań Makiej byŭ u epicentry troch skandałaŭ. Pieršy ź ich — aryšt prarasijskich publicystaŭ za raspalvańnie mižnacyjanalnaj varažniečy, što pisali pad psieŭdanimami na rasijskich impierskich sajtach.
«Pry hetym biełaruskija ŭłady nie źviartajuć uvahi na adkrytyja rusafobskija publikacyi ŭ dziaržaŭnych i niezaležnych ŚMI», — jak elehantna aŭtar pastaviŭ u adzin šerah usie biełaruskija ŚMI. Karavuł! Rusafobija na ŭsich uzroŭniach.
Dva inšyja skandały — heta nota pratestu rasijskamu boku ŭ suviazi z zajavaj Leanida Rašetnikava adnosna biełaruskaj movy i dziaržaŭnaści, a taksama naviedvańnie Makiejem «linii akupacyi» ŭ Hruzii.
«Uładzimir Makiej na sustrečach ź jeŭrapiejskimi i amierykanskimi dypłamatami zamoŭčvaje ab hramadzianach Biełarusi, jakija dziakujučy, u tym liku, i jaho namahańniam, pazbaŭlenyja mahčymaści naviedvać respubliku. Vizity ŭ krainu dla ich vielmi niebiaśpiečnyja, inakš možna pasialicca ŭ «amierykancy» (turma KDB) abo atrymać «ŭkoł parasonam», — vidać, Bałkuniec maje na ŭvazie siabie i Juryja Barančyka.
«Minsk maje patrebu ŭ narmalizacyi adnosin z krainami ES i ZŠA, ale nie canoj zdrady nacyjanalnych intaresaŭ respubliki i razbureńnia rasijska-biełaruskich adnosin», — turbujecca analityk.
Dźmitryj Bałkuniec pachodzić z Słonima, jamu 33 hady. U Biełarusi vučyŭsia ŭ sielskahaspadarčaj akademii. Potym skončyŭ mahistraturu EHU (Litva). U 2013 skončyŭ aśpiranturu pry Vyšejšaj škole ekanomiki ŭ Maskvie. U VŠE pracuje Andrej Suzdalcaŭ, hramadzianin Rasii, jakoha niekali departavali ź Biełarusi.
Namahańniami Bałkunca i Suzdalcava ŭ VŠE rehularna pravodziać sustrečy i kanfierencyi na temu Biełarusi. Jaho naviedvajuć jak apazicyjnyja palityki, nakštałt Taćciany Karatkievič i Volhi Karač, hetak i zachodnierusisty kštałtu Lva Kryštapoviča i Juryja Barančyka.
Artykuł Bałkunca śviedčyć ab adarvanaści analityka ad biełaruskich realij, niaviedańnia ŭnutranaha žyćcia krainy i čynavienstva. A moža razhladacca jak sihnał, što Maskva patrabuje adstaŭki Uładzimira Makieja. Jak by toje nie było, ale miechanizm dyskredytacyi ministra zamiežnych spravaŭ, zapuščany jašče letaś, praciahvaje nabirać abaroty.
Ciapier čytajuć
«Ženia pahadziŭsia na budoŭlu, a nie vajavać. I tolki kali vyjdzie z zapoju!»: jak pradali ŭ rasijskuju armiju žychara Lozna. Achviara nie adna4
Kamientary