Pad Barysavam zabitaja ihumieńnia pravasłaŭnaha manastyra — najchutčej, adnoj z pasłušnic

U vioscy Barań Barysaŭskaha rajona zabitaja ihumieńnia Cviata-Ksienijeŭskaha žanočaha manastyra matuchna Vasilisa. Złačynstva było ździejśnienaje 5 studzienia paśla 21.00. Zatrymana padazronaja.

Jak paviedamiła aficyjny pradstaŭnik upraŭleńnia Śledčaha kamiteta pa Minskaj vobłaści Taćciana Biełanoh, pa fakcie zabojstva ihumieńni raspačataja sprava na padstavie art. 139 KK. U dačynieńni da padazronaj pryznačanaja psichołaha-psichijatryčnaja ekśpiertyza.

«Upraŭleńnie SK pa Minskaj vobłaści ŭsiebakova raźbirajecca ŭ abstavinach zdareńnia, — skazała Biełanoh. — Z udzielnikami trahičnaj padziei pracujuć śledčyja. Kiraŭnictvam USK chod vyśviatleńnia abstavinaŭ zdareńnia ŭziaty na kantrol».

Pavodle infarmacyi Barysaŭskaj jeparchii Biełaruskaj pravasłaŭnaj carkvy, u napadzie na ihumieńniu Śviata-Ksienijeŭskaha žanočaha manastyra matuchnu Vasilisu padazrajecca 29-hadovaja uradženka Kazachstana, jakaja žyvie pry manastyry. Jaje časova prytulili ŭ manastyry, žadajučy dapamahčy ŭ vyrašeńni žyćciovych prablem. «Na praciahu jaje znachodžańnia ŭ manastyry, asabliva napiaredadni taho, što zdaryłasia, adznačałasia psichičnaje rasstrojstva maładoj žančyny, jakoje i stała pryčynaj jaje strašnaha ŭčynku», — paviedamlaje pres-słužba jeparchii.

Ranicaj 6 studzienia ŭ manastyry prajšła paminalnaja słužba pa ihumieńni Vasilisie, jakuju ŭznačaliŭ jepiskap Barysaŭski i Mar`inahorski Vieńjamin. U malitvie ŭziali ŭdzieł siostry manastyra, a taksama pradstaŭniki abłasnoj i rajonnaj administracyi — namieśnik staršyni Minabłvykankama Viktar Sirenka i kiraŭnik rajvykankama Uładzimir Miranovič.

Raźvitańnie z pamierłaj adbudziecca 8 studzienia.

Zhodna ź infarmacyjaj sajta Cviata-Ksienijeŭskaha manastyra, ihumieńnia Vasilisa (Miadźviedź) naradziłasia 10 sakavika 1949 hoda ŭ horadzie Sośnica Čarnihaŭskaj vobłaści (Ukraina). Skončyła histaryčny fakultet Čarnihaŭskaha piedahahičnaha instytuta. Vykładała ŭ škole. Była prychadžankaj Pietra-Paŭłaŭskaha sabora ŭ Minsku, zatym paśla ŭtvareńnia Jelizaviecinskaha siastrynstva pry sabory stała siastroj miłasernaści. U 2001 hodzie słužyła pasłušnicaj Śviata-Jelisaviecinskaha žanočaha manastyra pad Minskam, potym pryniała postryh. Z 2004 hoda z dabrasłavieńnia mitrapalita Minskaha i Słuckaha Fiłareta, patryjaršaha ekzarcha ŭsiaje Biełarusi, — ihumieńnia Śviata-Ksienijeŭskaha žanočaha manastyra ŭ vioscy Barań Barysaŭskaha rajona.

Padazravanaja ŭ zabojstvie ihumieńni manastyra ŭ Barysaŭskim rajonie zatrymanaja

U MUS udakładnili hramadzianstva padazravanaj u zabojstvie ihumieńni

• 0
• 0
• 0
• 0
• 0
• 0
• 0
• 0