Pieršy kiraŭnik «ŁNR» raskazaŭ, što amal usie zasnavalniki respubliki zahinuli ŭ mižusobicach
Valer Bołataŭ, pieršy kiraŭnik samaabvieščanaj «Łuhanskaj narodnaj respubliki», raspavioŭ pra kanflikty siarod bajevikoŭ.
U intervju «Rosbałtu» jon nazvaŭ sabatažnikam eks-ministra abarony «ŁNR» Ihara Płatnickaha, jaki ciapier źjaŭlajecca prezidentam respubliki.
«Ja ŭziaŭ jaho kamandziram bataljona, a potym pryznačyŭ ministram abarony. Nie čakaŭ ad jaho zdrady», — skazaŭ Bołataŭ. Ź jaho słoŭ, u žniŭni 2014 hoda, kali Bołataŭ časova źjechaŭ na terytoryju Rasii, u «ŁNR» faktyčna adbyŭsia pieravarot.
Bołataŭ naradziŭsia ŭ rasijskim Rastovie ŭ 1970 hodzie, u savieckija časy słužyŭ u Viciebskaj dyvizii PDV.
Jak kaža Bołataŭ, Płatnicki prykłaŭ ruku da źniščeńnia ŭsich mahčymych kankurentaŭ.
Da taho ž, da ŭnutranych palityčnych, ekanamičnych i asabistych kanfliktaŭ dadajucca sprečki pamiž maskoŭskimi «kuratarami». Toje, što Hienadź Cypkałaŭ skončyŭ žyćcio samahubstvam, były premjer «ŁNR» ličyć chłuśnioj:
«Ja liču, što jaho katavali, mahčyma, u pracesie pierahnuli pałku. Ci, moža, zabili śpiecyjalna, a potym zasunuli ŭ piatlu. Ale heta nie byŭ suicyd. Cypkałaŭ byŭ niepažadany dla Płatnickaha — u jaho byŭ inšy kuratar u Maskvie».
«Uvohule, vielmi šmat źnikła niepažadanych ludziej, vy bačycie tolki jarkija prykłady, takija jak Cypkałaŭ», — kaža Bołataŭ, zhadvajučy zabitych palavych kamandziraŭ bajevikoŭ «Navarosii».
«Biednovu, Mazhavomu, Dromavu prypisvajuć roznaje ŭ siłu taho, što jany navat paśla śmierci majuć vialiki aŭtarytet. Majo asabistaje mierkavańnie, što ad ich pazbavilisia. Prybrali ŭsich, chto pačynaŭ pratestny ruch. Sučasnamu kiraŭnictvu nie patrebnyja idejnyja ludzi», — raspaviadaje były kiraŭnik «ŁNR».
Bołataŭ ličyć ciapierašniuju «ŁNR» całkam karumpavanaj strukturaj, jakaja raskradaje navat humanitarnuju dapamohu.
«Raskvitnieła kumaŭstvo, kiraŭničyja pasady zajmajuć ludzi biez profilnaj adukacyi, niazdolnyja čymści kiravać. Pastupova ŭłada ŭ «ŁNR» idzie da krachu, a ludzi, jakija bolš-mienš zdolnyja kiravać, užo vykonvajuć zadačy dla Ukrainy», — skazaŭ eks-funkcyjanier.
Kamientary