Ministr abarony Polščy Antoni Maciarevič zajaviŭ, što Vojciech Jaruzelski i Česłaŭ Kiščak buduć pazbaŭlenyja hienieralskaha zvańnia, piša Radyjo Polšča.
U 35-ju hadavinu ŭviadzieńnia vajennaha stanovišča ŭ Polščy ministr nacyjanalnaj abarony Antoni Maciarevič skazaŭ, što vajennaje stanovišča možna paraŭnać ź pieršymi hadami savieckaj akupacyi Polščy:
«Vajennaje stanovišča varta razhladać jak apošniuju sprobu kamunistyčnych uładaŭ złamać chrybiet polskamu narodu šlacham represij, niabačanych u Jeŭropie z časoŭ stalinizmu. A nastupstvy vajennaha stanovišča ŭ vyniku zdrady častki apazicyjnych kołaŭ adčuvajucca pa siońniašni dzień».
Ministr Maciarevič paviedamiŭ, što Vojciech Jaruzelski i Česłaŭ Kiščak — były ministr unutranych spraŭ Polščy pry Jaruzelskim i adna z klučavych fihur režymu vajennaha stanovišča — buduć pazbaŭlenyja hienieralskaha zvańnia, i što z hetaj metaj užo viaducca zakanadaŭčyja pracedury:
«Siońnia apošni dzień, kali jaki-niebudź čynoŭnik ź Ministerstva nacyjanalnaj abarony moža vymavić słova «hienierał» z proźviščam pana Jaruzielskaha. My robim kroki pa pazbaŭleńni vajskovych zvańniaŭ jak u dačynieńni da pana Jaruzielskaha, tak i pana Kiščaka. Złačyncy, na jakich lažyć adkaznaść za ŭzbrojenyja dziejańni suprać ułasnaha naroda, nie zasłuhoŭvajuć vajskovych zvańniaŭ».
Antoni Maciarevič padkreśliŭ, što havorka idzie nie pra razžałavańnie ŭ radavyja, a mienavita pra pazbaŭleńnie zvańnia.
Pracedura pazbaŭleńnia zvańniaŭ Jaruzielskaha i Kiščaka stanie mahčymaj paśla ŭviadzieńnia papravak u zakon, jaki rehuluje pryncypy usieahulnaha vajskovaha abaviazku pa abaronie Respubliki Polšča.
Kamientary