Pra heta paviedamili ŭ hramadskaj arhanizacyi «Achova ptušak Baćkaŭščyny» (APB).
Hetaja ptuška sustrełasia ŭ nie samym ramantyčnym miescy — na Paŭnočnym śmietniku Minska, jaki aficyjna nazyvajecca palihonam ćviordych bytavych adchodaŭ «Paŭnočny». Čajka vialikich pamieraŭ ź biełymi kryłami trapiła ŭ pole zroku dyrektara APB Alaksandra Vinčeŭskaha, jaki ŭ apošnija 10 hadoŭ śpiecyjalna «palavaŭ» na hety vid, šukajučy jaho siarod tysiač čajek.
«U hety raz na śmietniku było kala tysiačy čajek. Ja adrazu z radaściu paklikaŭ da truby svaich spadarožnikaŭ, čajka dała siabie razhladzieć i sfatahrafavać. Pieršyja sumnievy ŭ pravilnym vyznačeńni chutka źnikli. Praź piać chvilin usia zhraja ŭźlacieła, patryvožanaja koršakam. My praviali na palihonie jašče dźvie hadziny, ale bolš burhamistra nie sustreli», — skazaŭ Alaksandr Vinčeŭski.
Burhamistr — heta druhaja pa vieličyni čajka ŭ śviecie, z razmacham kryłaŭ da 158 sm i vahoj da 2 kh. Hety vid hniazdujecca ŭ palarnych abłaściach, a zimu pravodzić zvyčajna ŭ Paŭnočnaj Atłantycy. Rehistracyi hetaha vidu ŭžo byli ŭ krainach-susiedziach: Litvie, Łatvii, Polščy. Heta davała padkazku biełaruskim arnitołaham, što ptuška moža zalacieć i ŭ Biełaruś.
Paćvierdzić vyznačeńnie vidu i ŭnieści burhamistra 330-m vidam u śpis ptušak Biełarusi pavinna Biełaruskaja arnita-faŭnistyčnaja kamisija (BAFK).
Kamientary