Ukraina nie ličyć nieabchodnaj dapamohu Biełarusi ŭ arhanizacyi vybaraŭ na Danbasie, zajaviŭ žurnalistam ukrainski ministr zamiežnych spraŭ Pavieł Klimkin pa vynikach sustrečy kiraŭnikoŭ MZS «narmandskaj čaćviorki» ŭ Minsku.
Jon adznačyŭ, što Biełaruś źjaŭlajecca siabram ABSIE i pryznaje pryncypy i standarty hetaj arhanizacyi. Pry hetym Klimkin ukazaŭ, što dapamohu ŭ arhanizacyi vybaraŭ i nazirańnia za imi akazvaje Biuro pa demakratyčnych instytutach i pravach čałavieka ABSIE. Mienavita z hetym miechanizmam Biełaruś pahadziłasia jak siabra arhanizacyi.
U svaju čarhu vice-śpikier Viarchoŭnaj Rady Ukrainy Iryna Hieraščanka zajaviła, što kraina ŭ stanie samastojna pravieści vybary na svajoj terytoryi ŭ lubym rehijonie. Jana taksama padkreśliła, što ŭ pytańnie praviadzieńnia vybaraŭ va Ukrainie nie pavinien umiešvacca i rasijski bok nakštałt taho, jak jon heta rabiŭ u Krymie.
«Dapamoha ŭ praviadzieńni vybaraŭ nam nie patrebna, — skazała Hieraščanka. — Nam patrebna dapamoha ŭ nacisku na Rasiju, kab jana pajšła z ukrainskaj terytoryi».
Heta pytańnie było ŭźniata paśla taho, jak na pres-kanfierencyi dla rasijskich žurnalistaŭ 17 listapada Łukašenka zajaviŭ nakont Danbasa: «…My hatovyja lubuju rolu tam syhrać… Kali vy chočacie, kab my tam praviali vybary, prytym sumlenna, absalutna sumlenna — miascovyja vybary, pra jakija stolki kažuć, — my hatovyja heta arhanizavać. Kali vy chočacie, kab hetyja 400 kiłamietraŭ miežaŭ pamiž Danbasam i Rasijaj, pamiž Ukrainaj i Rasijaj na hetym etapie treba zakryć, navieści paradak, — kali łaska, my heta zrobim. Kali vy hetaha chočacie».
U cełym, pa pryznańni ŭdzielnikaŭ siońniašniaj sustrečy, kiraŭnikoŭ MZS «narmandskaj čaćviorki», na pieramovach u Minsku, jakija doŭžylisia kala čatyroch hadzin, jakich-niebudź praryvaŭ dasiahnuta nie było. «Minskija damoŭlenaści buksujuć, navat nie atrymlivajecca ŭzhadnić paśladoŭnaść zachadaŭ, — skazaŭ kiraŭnik MZS Rasii Siarhiej Łaŭroŭ. — Paśladoŭnaść zachadaŭ u śfiery biaśpieki i palityčnych reformaŭ pakul ŭzhadnić nie ŭdajecca».
Baki damovilisia, što budzie praciahnuta rabota jak u «narmandskim farmacie», na ŭzroŭni ekśpiertaŭ, jurystaŭ, vajennych ekśpiertaŭ, dypłamatyčnych pradstaŭnikoŭ, tak i ŭ kantaktnaj hrupie i jaje padhrupach.
Kamientary