Škołam zabaranili adznačać Dzień śviatoha Valancina
Niepažadanym abvieščany taksama Chełoŭin.
Čytač dasłaŭ u Redakcyju «Našaj Nivy» dakumient za podpisam Dźmitryja Chomy — načalnika ŭpraŭleńnia adukacyi Viciebskaha abłvykankama.
Dakumient «Ab śviatach» adrasavany kiraŭnikam ustanoŭ adukacyi vobłaści — jon zabaraniaje śviatkavańnie Chełoŭina i Dnia Zakachanych u škołach i vučelniach.
Čynoŭnik abłvykankama vykazvaje «zakłapočanaść umacavańniem u śviadomaści navučencaŭ destruktyŭnych padmurkaŭ sučasnaj masavaj kultury».
«Źjaŭlajučysia praduktam sučasnaj masavaj kultury Zachadu, hetyja hetak zvanyja «śviaty» nie adnosiacca ni da relihijnych śviataŭ jakojści z kanfiesij, zarehistravanych na terytoryi Respubliki Biełaruś, ni da śvieckich śviataŭ našaj dziaržavy. [Jany] nosiać destruktyŭny charaktar, padryvajuć padmurki marali, siamji i nacyjanalnych tradycyj biełaruskaha naroda», — havorycca ŭ liście.
Sučasnaja moładź, śćviardžaje adździeł adukacyi Viciebskaha abłvykankama, «raźniavolvaje žyviolnyja instynkty», adznačajučy Chełoŭin.
Dapamahajuć joj u hetym, śćviardžajecca, «ciomnyja» zadavalnieńni ŭ načnych kłubach: ałkahol, tytuń i narkotyki.
Kali Chełoŭin krytykujuć i carkoŭnyja ijerarchi, a taksama palityki-kansiervatary, to Dzień Zakachanych raniej pad krytyku nie traplaŭ.
Praŭda, katalickija śviatary zaklikali nie kamiercyjalizavać jaho, a Rasijskaja pravasłaŭnaja carkva ŭ piku jamu sprabuje pryščapić kult śviatych Piatra i Fiaŭrońni, ale ŭ Biełarusi jon mała raspaŭsiudžany.
Svaju antypatyju da Dnia Zakachanych čynoŭniki tłumačać błytana.
«Dadzienaje śviata adznačajecca tak šyroka, što mnohija ŭstanovyja adukacyi akazalisia ŭciahnutyja ŭ hihanckuju masavuju industryju infarmacyjna-ideałahičnaha i ekanamičnaha charaktaru (nabyćcio navučencami paštovak)», — tak tłumačycca ŭ zahadzie.
Čynoŭniki začapilisia za toje, što Dzień śviatoha Valancina ŭźnik u Staražytnym Rymie ŭ pieryjad jaho «maralnaj i palityčnaj dehradacyi».
Sychodziačy ź pieraličanych dovadaŭ, ustanovam adukacyi nastojliva rekamiendujuć adračysia śviatkavańnia hetych dzion i pryniać ich z vychavaŭčych płanaŭ.
Niaŭžo Dzień Zakachanych nastolki vialikaja prablema dla adukacyi, kab rassyłać admysłovyja zahady?
«Naša Niva» spytała pra heta samoha Dźmitryja Chomu, ale toj byŭ zaniaty i daručyŭ adkazać na pytańni svajmu namieśniku — Valeryju Kunaško, načalniku adździeła vychavańnia.
«Vy na movie razmaŭlajecie, miarkujučy pa ŭsim, chryścijaninam źjaŭlajeciesia, nu navošta vam hetyja śviaty čužyja? — schodu adkazaŭ Kunaško. — Heta nie našyja, nie nacyjanalnyja śviaty, tym bolš u vas, razmaŭlajučy pa-biełarusku… Vy pavinny naadvarot — padtrymlivać…»
«Hetaje śviata [Chełoŭin] nie było nikoli, nie śviatkavałasia. Apošnim časam jaho ŭnieśli ŭ moładzievy asiarodak — u načnych kłubach… Ja dumaju što i śledstva, jakaje viadziecca pa hetym vypadku ź bienzapiłoj u handlovym centry ŭ Minsku… Jon taksama chacieŭ i ŭ MITSO pranieści, i hetak dalej… Razumiejecie, viera ŭ złych duchaŭ, što ŭsie jany prapahandujuć, heta škodna dla maładych psichična nie zahartavanych maładych ludziej. Dla ich heta nie jość dobra», — praciahnuŭ čynoŭnik.
Čynoŭniki spadziajucca pieramahčy hłabalizacyju svaimi ŭkazami? — spytalisia my.
«Chaj adznačajuć našyja Kaladki, Saraki.
I vam, biełaruskamoŭnamu, i haziecie, jak nikomu treba prapahandavać našyja nacyjanalnyja śviaty. A nie čužyja nam, pryniesienyja zvonku. Ja skončyŭ histfak BDU, pryjechaŭ i pieršy raz pačuŭ, što takoje Dzień Śviatoha Valancina — cełaja industryja, paštovački hetyja treba kuplać…».
Skončyŭ svoj adkaz čynoŭnik tym, što «ŭsie biełaruskamoŭnyja musiać padpisacca pad hetym listom», bo «navat na kalehii Minadukacyi havaryłasia, što heta absalutna čužyja nam śviaty».
«Naša Niva» — bastyjon biełaruščyny
PADTRYMAĆA što vy dumajecie pra heta? Vykazvajciesia ŭ kamientach i hałasujcie ŭ apytancy.
Čytajcie taksama: Dzień śviatoha Valancina: śvietłaja duchoŭnaja lehienda vyrasła z pahanskaha hulbišča łupierkalij
Sieviaryniec prapanuje hnać Chełoŭin ź Biełarusi pahanym vienikam
Apytanka
Apytanka
-
«Łukašenku nielha nazvać navat małodšym partnioram Pucina». Kit Kiełah raskazaŭ pra rolu Łukašenki ŭ pieramovach ZŠA i Rasii
-
U Barysavie dziacieł zaniaŭsia dyzajnam fasadaŭ i nie daje žycharam zranku spać
-
«Tak zvanaja postpienitencyjarnaja adaptacyja». Departavany palitviazień Kiryła Paźniak apublikavaŭ svajo FOTA z dočkami
Kamientary