Rekvijem pa mary (Requiem for a Dream)
ZŠA, 2000, kalarovy, 102 chv.
Režyser: Daren Aranofski
Roli vykonvajuć: Elen Biorstyn, Džared Leta, Dženifer Kaneli, Marłon Ŭejienz, Krystafer MakDonald, Łuiza Łaser
Žanr: Drama
Premii, festy: Naminacyja na “Oskara” i “Załaty hlobus” za najlepšuju žanočuju rolu (Elen Biorstyn), pryzy tavarystva krytykaŭ – usiaho 20 uznaharodaŭ i 34 naminacyi.
Adznaka: 9 (z 10)
Dva siabry Hary (Džared Leta) i Tajran (Marłon Ŭejienz) – drobnyja narkahandlary. Hary nadakučyli kryminalnyja mitrenhi – i razam ź siabroŭkaj Meryjan (Dženifer Kaneli) jon źbirajecca raspačać narmalny biznes. Ale narkotyki pieraŭtvarajuć žyćcio čatyroch ludziej u rekvijem pa apošniaj mary.
Hety film treba hladzieć! Stužka Darena Aranofskaha – najvažniejšaja karcina 2000-ych, praniźliva-šokavaja mara, zahublenaja hierainam i halucynacyjami, aperatarski cud i tryjumf majsterstva.
«Rekvijem pa mary» – sama najlepšy j najpapularniejšy film Darena Aranofskaha. Kali papiaredniaja karcina “Pi” – heta zmročna-vykštałconaje avanharodovaje tryźnieńnie “nie dla ŭsich”, a nastupny “Fantan” – kalihrafičnyja praktykavańni ŭ medytacyi i archietypach, to “Rekvijem pa mary” – heta piakučaja historyja ludziej, raskazanaja śviežaj, sučasnaj movaj.
Paradaksalny mantaž, vostryja, amytyja ślazoj i bolem kadry Mećju Libacika – i niabiosnaja muzyka Klinta Menseła – na tle panoŭnaha zła.
Aperatar na filmie sapraŭdy płakaŭ – kali Eli Biorstyn vymaŭlała svoj manaloh pra staraść. Aktrysa hraje ŭ filmie maci Hary – jana chudnieje, šaleje, imčycca ŭ čyrvonaj sukiency pa vulicy, jaje palać elektrašokam, pryviazvajuć da łožka. Dženifer Kaneli ŭ roli Meryjan prachodzić pakuty, jakija j nie śnilisia kolišniaj hieraini “Fenomenaŭ”; Džared Leta – pa kavałkam hublaje žyćcio i cieła.
Ale samyja nievynosnyja kadry ŭ filmie – słužać katarsisu.
Nielha nie spačuvać hierojam, nielha nie adčuvać bolu, i nielha nie zachłynacca Rekvijemam, kali zastalisia adny tolki mary.
Tolki adzin seans u kinateatry “Pieramoha” 26 červienia a 18.00.
Ciapier čytajuć
U Sule adznačyli Kupalle. Haściej było stolki, što na darohach utvarylisia zatory6
Kamientary