U Biełarusi pryniaty płan pa realizacyi mižnarodnych rekamiendacyj u śfiery pravoŭ čałavieka

Mižviedamasny płan pa realizacyi rekamiendacyj Univiersalnaha pieryjadyčnaha ahladu (UPA) na 2016—2019 hady pryniaty ŭ Biełarusi. Adpaviednaja pastanova Savieta ministraŭ № 860 ad 24 kastryčnika apublikavanaja na sajcie ŭrada.

Univiersalny pieryjadyčny ahlad — heta miechanizm, stvorany ŭ miežach AAN dla vyznačeńnia situacyi z pravami čałavieka va ŭsich krainach śvietu, stupieni realizacyi dziaržavami ŭsiaho śpiektra pravoŭ čałavieka: ekanamičnych, palityčnych, sacyjalnych, hramadzianskich i kulturnych. Krainy prachodziać praceduru ahladu adzin raz na čatyry z pałovaj hady i pavodle vynikaŭ atrymlivajuć ad Rady AAN pa pravach čałavieka rekamiendacyi pa palapšeńni situacyi.

Mižviedamasny płan pa realizacyi rekamiendacyj UPA na 2016—2019 hady ŭ pastanovie Saŭmina nazvany prahramnym dakumientam, skiravanym na «sadziejničańnie vykanańniu Biełaruśsiu ŭziatych mižnarodnych abaviazacielstvaŭ u śfiery pravoŭ čałavieka, uklučajučy ŭdaskanaleńnie zakanadaŭstva i pravaprymianialnaj praktyki».

Płan praduhledžvaje realizacyju šerahu mierapryjemstvaŭ, siarod jakich:

- praciah usiebakovaha vyvučeńnia pytańnia ab metazhodnaści stvareńnia ŭ Biełarusi nacyjanalnaha instytuta pa pravach čałavieka;

- praviadzieńnie revizii pracy hramadskich kansultacyjnych savietaŭ pry respublikanskich orhanach dziaržaŭnaha kiravańnia z metaj pavyšeńnia prazrystaści ich dziejnaści;

- uzajemadziejańnie z Kamitetam AAN pa pravach čałavieka ŭ miežach pracedury razhladu indyvidualnych paviedamleńniaŭ, praduhledžanaj Fakultatyŭnym pratakołam da Mižnarodnaha pakta ab hramadzianskich i palityčnych pravach ad 16 śniežnia 1966 hoda;

- praviadzieńnie analizu pretenzij, jakija najbolš časta adrasujucca biełaruskimi hramadzianami ŭ Kamitet AAN pa pravach čałavieka ŭ miežach pracedury razhladu indyvidualnych paviedamleńniaŭ, a taksama pryniatych pa ich mierkavańniaŭ kamiteta z metaj mahčymaha ŭliku pry ŭdaskanaleńni zakanadaŭstva i pravaprymianialnaj praktyki ŭ hetaj śfiery;

- praciah praktyki zaprašeńnia z aficyjnymi vizitami śpiecyjalnych tematyčnych pracedur Rady AAN pa pravach čałavieka;

- vyvučeńnie pytańnia ab metazhodnaści stvareńnia ŭ pradstaŭnictvie AAN/PRAAN u Biełarusi pasady daradcy Upraŭleńnia viarchoŭnaha kamisara AAN pa pravach čałavieka;

- prapracoŭka vizitu ŭ Biełaruś viarchoŭnaha kamisara AAN pa pravach čałavieka;

- prapracoŭka pytańnia ab zaprašeńni ź vizitam u Biełaruś śpiecyjalnaha pradstaŭnika hienieralnaha sakratara AAN pa pytańni ab hvałcie ŭ dačynieńni da dziaciej;

- prapracoŭka pytańnia ab udaskanaleńni (raspracoŭcy novych) narmatyŭnych pravavych aktaŭ, skiravanych na prafiłaktyku hvałtu ŭ siamji;

- praviadzieńnie infarmacyjna-aśvietnych kampanij, skiravanych na prafiłaktyku hvałtu ŭ siamji;

- vyvučeńnie mižnarodnaha vopytu pa zabieśpiačeńni aŭdyja- ci videazapisami dopytaŭ u terytaryjalnych orhanach unutranych spraŭ i śledčych izalatarach u jakaści srodku praduchileńnia katavańniaŭ i žorstkaha abychodžańnia, razhlad metazhodnaści prymianieńnia takoha vopytu ŭ Biełarusi;

- praviadzieńnie mierapryjemstvaŭ z metami ŭsiebakovaha razhladu mižnarodnych tendencyj u pytańni ab prymianieńni śmiarotnaha pakarańnia i staŭleńnia da hetaj temy hramadskaści;

- praciah ŭzajemadziejańnia z ABSIE pa pytańniach udaskanaleńnia vybarčaha pracesu ŭ Biełarusi;

- raspracoŭka navukova abhruntavanych prapanoŭ ab farmiravańni nacyjanalnaha płana dziejańniaŭ pa realizacyi Kanviencyi ab pravach invalidaŭ.

Płan uklučaje 100 mierapryjemstvaŭ u roznych śfierach.

Jak adznačajecca ŭ pastanovie ŭrada, mižviedamasny płan skiravany ŭ tym liku na «vyjaŭleńnie prablem u halinie pravoŭ čałavieka i raspracoŭku mahčymych zakanadaŭčych i instytucyjnych mier pa ich vyrašeńni», a taksama na «efiektyŭnaje vykarystańnie mižnarodnaha vopytu dla ŭdaskanaleńnia dziaržaŭnaj palityki ŭ śfiery pravoŭ čałavieka».

Biełaruskija pravaabaroncy ŭ cełym pazityŭna aceńvajuć pryniaćcie takoha dakumienta, ale ličać, što jon pazbaŭleny kankretyki i naŭrad ci moža radykalna paŭpłyvać na situacyju.

«Farmuloŭki płana ŭ asnoŭnym kažuć pra «praciah vyvučeńnia» pytańnia i «metazhodnaść stvareńnia abo prymianieńnia». Niezrazumieła, što chočuć atrymać u vyniku. I heta minus», — adznačyŭ staršynia Biełaruskaha Chielsinkskaha kamiteta (BCHK) Aleh Hułak.

Siarod plusaŭ dakumienta jon adznačyŭ ukazańnie dziaržorhanaŭ, adkaznych za vykanańnie kankretnych mierapryjemstvaŭ. «Taksama praduhledžanyja štohadovyja spravazdačy ab chodzie ich vykanańnia, ale niezrazumieła pakul, ci buduć hetyja spravazdačy publičnymi. My budziem damahacca taho, kab u ramkach realizacyi płana adkaznyja orhany zrabili zrazumiełuju praceduru abmierkavańnia i ŭniasieńnia prapanoŭ i — samaje važnaje — kab vyniki hetych abmierkavańniaŭ byli publičnyja», — dadaŭ Hułak.

Namieśnik staršyni zakrytaha ŭładami pravaabarončaha centra «Viasna» Valancin Stefanovič źviarnuŭ uvahu na toje, što ich da ŭdziełu ŭ abmierkavańni płana nie zaprašali. «Choć my aktyŭna ŭdzielničali ŭ padrychtoŭcy alternatyŭnaha dakładu ŭ ramkach UPA i vypracoŭcy rekamiendacyj», — dadaŭ jon.

Pravaabaronca taksama źviarnuŭ uvahu na niekankretnyja farmuloŭki płana. «Naprykład, tam havorycca pra praciah vyvučeńnia pytańnia ab metazhodnaści ŭviadzieńnia pasady ambudsmiena. Heta značyć, nie ŭvieści hety post, a tolki praciahnuć abmierkavańnie. Tyja rekamiendacyi, jakija my raspracoŭvali pry padrychtoŭcy alternatyŭnaha dakładu, siudy nie ŭvajšli. Najbolš pryncypovyja dla nas rečy nie ŭvajšli», — padkreśliŭ jon.

U toj ža čas Stefanovič pazityŭna aceńvaje sam fakt pryniaćcia płana: «Dobra, što jość taki dakumient. Heta ŭpieršyniu, napeŭna, takoje źjaviłasia ŭ nas. Kali niešta z hetaha płana atrymaje svajo ŭvasableńnie ŭ vyhladzie kankretnych źmienaŭ u zakanadaŭstvie, my heta budziem tolki vitać». «Chaciełasia b, kab urad ŭzajemadziejničaŭ z pravaabarončymi arhanizacyjami ŭ vykanańni hetaha płana», — dadaŭ jon.

Na jaho dumku, pryniaćciem hetaha płana ŭłady chočuć prademanstravać svajo ŭzajemadziejańnie z AAN. «Choć u poŭnaj miery ŭrad ź miechanizmami AAN nie ŭzajemadziejničaje. Rašeńni Kamiteta pa pravach čałavieka nie vykonvajucca, byli zatrymki z pradastaŭleńniem spravazdač ŭ kamitety AAN, specdakładčyka AAN pa Biełarusi ŭ krainu nie puskajuć, z rabočaj hrupaj pa advolnych zatrymańniach ŭłady nie supracoŭničajuć. Ale miechanizm UPA dla ich prymalny, bo źjaŭlajecca ahulnym dla ŭsich krain, a nie vybarčym tolki dla Biełarusi», — adznačyŭ pravaabaronca.

• 0
• 0
• 0
• 0
• 0
• 0
• 0
• 0