Ašukancy na miljon. Vykrytaja jašče adna «aŭtamabilnaja piramida» ŭ Minsku

Zavieršana rasśledavańnie pa spravie ab machlarstvie z aŭtamabilami ŭ Minsku. 162 čałavieki zastalisia ni z čym, a abvinavačanyja zarabili bolš za 1,3 młn dalaraŭ. Kali vina budzie dakazanaja, im pahražaje da dziesiaci hadoŭ za kratami.

Pavialičyć

Pad vartaj znachodziacca ŭsie piaciora ŭdzielnikaŭ złačynnaj hrupy, uklučajučy kiraŭnika. Pa viersii śledstva, jany arhanizavali aŭtasałon «Frešmotars», da hetaha zasnavali pryvatnyja pradpryjemstvy «Avanhardchaŭz» i «Hud roŭd». Zajmalisia kuplaj-prodažam aŭtamabilaŭ, dla hetaha arandavali ofisy i parkoŭki ŭ Minsku.

Złačynnaja schiema pracavała pa nastupnym scenary: z haspadarom mašyny zaklučali damovu kamisii, dalej abiacali aŭtamabil pradać i viarnuć hrošy paśla zakančeńnia ŭkazanaha terminu. Paśla hetaha machlary ŭ samyja karotkija terminy pradavali pryniatyja na kamisiju aŭtamabili trecim asobam, u tym liku i pa bolš nizkim košcie, čym toj, što byŭ ŭkazany ŭ damovie z uładalnikam.

Pieršapačatkovym uładalnikam aŭto hrošy nie viartali naohuł albo častkova kampiensavali straty. «Biznesoŭcy» tłumačyli heta časovymi finansavymi ciažkaściami ŭ kampanii. Pa fakcie ž atrymanyja hrošy tracili na svaje patreby.

Schiema pracavała amal hod: z maja 2014-ha pa krasavik 2015 hoda.

Jak adznačaje Śledčy kamitet, papiarednie vyjaŭlenyja 164 fakty zavałodańnia aŭtamabilem šlacham machlarstva, 162 čałavieki pryznanyja paciarpiełymi. Suma škody skłała bolš za 2 615 000 denaminavanych rubloŭ. Heta bolš za 1,3 młn dalaraŭ.

Viadoma miescaznachodžańnie 160 aŭtamabilaŭ, nakładzieny aryšt na hrošy fihurantaŭ kryminalnaj spravy.

Usim piaciarym vystaŭlenaje abvinavačvańnie ŭ machlarstvie, ździejśnienym arhanizavanaj hrupaj i ŭ asabliva bujnym pamiery (č. 4 art. 209 KK). Sankcyja artykuła praduhledžvaje pakarańnie ad 3 da 10 hadoŭ pazbaŭleńnia voli z kanfiskacyjaj majomaści.

Heta nie pieršy vypadak stvareńnia «aŭtamabilnaj piramidy» ŭ Biełarusi. Sa žniŭnia 2012 pa śniežań 2013 hoda aŭtachaŭs «Avtopapa» i dva indyvidualnyja pradprymalniki zaklučyli piśmovyja i vusnyja pahadnieńni z hramadzianami z nahody prodažu ich aŭtamabilaŭ. Uziatyja na siabie abaviazacielstvy abvinavačanyja nie vykanali. Paciarpiełych akazałasia bolš za 40 čałaviek.

Ale samym hučnym stała sprava aŭtachaŭsa «AvtoKompaniSevien». 500 čałaviek addali svaje mašyny ŭ «kamisijonku», ale hrošy tak i nie atrymali. U historyi biełaruskaha pravasudździa jašče nie było pracesu, pa jakim by prachodziła stolki paciarpiełych. Suma škody taksama ŭražvaje — bolš za 94 młrd rubloŭ. Heta amal 4,5 młn dalaraŭ.

• 0
• 0
• 0
• 0
• 0
• 0
• 0
• 0