Suśvietnaja arhanizacyja achovy zdaroŭja vykazała padtrymku krainam, jakija ŭvodziać dadatkovy «cukrovy padatak» na sałodkija pradukty i napoi.
Zhodna z apublikavanym novym dakładam SAAZ, pavieličeńnie koštu na sałodkija napoi navat na 20% pryvodzić da źnižeńnia ich spažyvańnia i sadziejničaje pierachodu nasielnictva na bolš zdarovaje charčavańnie ŭ cełym.
Raniej Suśvietnaja arhanizacyja achovy zdaroŭja prosta vystupała z rekamiendacyjami pamienšyć spažyvańnie cukru, ustrymlivajučysia pry hetym ad adkrytaj padtrymki padatkovych mier.
Niekatoryja krainy, u tym liku Mieksika i Vienhryja, užo ŭviali dadatkovy padatak na sałodkija pradukty i napoi. U nastupnym hodzie anałahičny «cukrovy padatak» uvodzić PAR — pieršaja siarod krain Afryki.
Źnižeńnie spažyvańnia tak zvanych svabodnych cukraŭ viadzie da pamianšeńnia kolkaści ludziej, jakija pakutujuć na atłuścieńnie, dyjabiet i karyjes, pakazvaje SAAZ.
Da svabodnych cukraŭ adnosiacca monacukrydy, takija jak hlukoza i fruktoza, a taksama dycukrydy, naprykład, cukroza abo stałovy cukar, dadavanyja ŭ charčovyja pradukty i napoi vytvorcami.
Svabodnyja cukry taksama naturalnym čynam utvarajucca ŭ pryrodnych umovach i prysutničajuć u miodzie, siropach, i kancentratach fruktovych sokaŭ. SAAZ nie ličyć niebiaśpiečnym spažyvańnie naturalnych cukraŭ, jakimi bahatyja sadavina, harodnina i małako.
Pa słovach doktara Frančeska Branki, dyrektara departamienta SAAZ pa charčavańni dla zdaroŭja i raźvićcia, «z punktu hledžańnia pažyŭnaj kaštoŭnaści ludziam u dyjecie naohuł nie patrebny cukar».
Branka rekamienduje abmiažoŭvać spažyvańnie cukru takim čynam, kab jano nie pieravyšała 10% ad sumarnaha sutačnaha enierhaspažyvańnia, a ŭ ideale składała mienš za 5%.
SAAZ adznačaje, što da «cukrovaha padatku» i inšych finansavych mier varta źviartacca tolki ŭ tym vypadku, «kali u praduktaŭ i napojaŭ z pavyšanym utrymańniem cukru jość bolš zdarovyja rynkavyja alternatyvy».
U dakładzie taksama havorycca pra toje, što subsidavańnie prodažaŭ śviežych harodniny i sadaviny z boku dziaržavy i, adpaviedna, źnižeńnie cen na ich maje stanoŭčy efiekt, pakolki ludzi ŭ vyniku ŭklučajuć u svoj racyjon ŭsio bolš harodniny i sadaviny, a ich dyjeta stanovicca bolš zdarovaj.
Ekśpierty SAAZ miarkujuć, što anałahičnyja padatkovyja miery tearetyčna mohuć taksama być efiektyŭnyja dla źnižeńnia spažyvańnia praduktaŭ, jakija majuć vysokaje ŭtrymańnie nasyčanych tłuščaŭ, transtłuščaŭ i soli.
Kamientary