Janukievič i Kalakin u efiry ANT havaryli ab falsifikacyjach i niespraviadlivaści vybaraŭ, Anisim i Karatkievič nie krytykavali
Tok-šou «Sprava pryncypu» na telekanale ANT 12 vieraśnia było pryśviečanaje temie parłamienckich vybaraŭ. U studyi byŭ pradstaŭleny dastatkova šyroki śpiektr palityčnych siłaŭ, u tym liku i apazicyjnych.
Niekatoryja paličyli za najlepšaje raskrytykavać chadu kampanii, a taksama hałasavańnia, inšyja ž naadvarot ustrymalisia ad usialakaj krytyki.
Da pieršych adnosicca kiraŭnik Partyi BNF Alaksiej Janukievič: «Na žal, my nie možam skazać, što vybary adbyvalisia svabodna, spraviadliva i sumlenna. Možna pavinšavać 110 čałaviek, jakija akazalisia ŭ parłamiencie, ale nielha pavinšavać biełaruski narod. Vybary nie adlustroŭvajuć volu narodu. Cikaŭnaść da vybaraŭ vielmi nizkaja, ludziam usio roŭna, chto pieramoža», — skazaŭ Alaksiej Janukievič.
Vadzim Hihin pasprabavaŭ zatrolić Alaksieja Janukievič adnosna taho, što niekatoryja siabry Partyi BNF išli na vybary z łozunhami restytucyi.
Eks-kandydatka na pasadu prezidenta Taćciana Karatkievič z «Havary praŭdu» ŭstrymałasia ad rezkaj krytyki vybarčaha pracesu. Jana tolki pažuryłasia, što troch miesiacaŭ kampanii niedastatkova, kab zapalić vybarcaŭ.
«Vybarcy daviarajuć mnie, im padabajecca maja prahrama, — skazała Karatkievič. — U nas sapraŭdy histaryčnaja padzieja. U nas u parłamiencie dva pradstaŭniki apazicyi».
«Try», — imhnienna adreahavaŭ Aleh Hajdukievič, majučy na ŭvazie pradstaŭnika ŁDPB.
«Dva», — adrezała Karatkievič.
«Vybary dali nam novaje pakaleńnie palitykaŭ. My bačym palitykaŭ, jakija hatovyja pracavać u svaich akruhach», — ličyć spadarynia Taćciana Karatkievič.
Z rezkaj krytykaj vystupiła kiraŭnička partyi «Zialonyja» Nastaśsia Darafiejeva, jana skazała: «Ciapier my zajmajemsia simulacyjaj abmierkavańnia simulacyi vybaraŭ». Darafiejeva pryjšła na efir u majcy «Nie — Astravieckaj AES», ale televizijniki staralisia jaje pakazvać tak, kab majka bačnaja nie była.
Kiraŭnik «Spraviadlivaha śvietu» Siarhiej Kalakin adznačyŭ, što nichto nie viedaje jak ličacca hałasy, navat členy vybarčaj kamisii. «Pra heta viedaje tolki kiraŭnik kamisii, jaki abviaščaje vyniki vybaraŭ.
Kali ŭłada pieramahaje z razryvam u 90%, to dajcie vy hetaj apazicyi paličyć hałasy pad kamierami. My skažam: my prajhrali. Ale ž vy tak schavali tak, što navat sama Jarmošyna nie viedaje, jak ličacca hałasy. Prazrystyja skryni ničoha nie rašajuć, ale jany zdolnyja vyjavić samyja hrubyja parušeńni. Tolki adkryty padlik hałasoŭ rašaje prablemy», — ličyć Siarhiej Kalakin.
«Kali ličyć apazicyjaj alternatyŭnaje bačańnie, to ja apazicyja», — skazała abranaja ŭ parłamient namieśnica staršyni TBM Alena Anisim. Tym nie mienš, ad niejkaj krytyki vybarčaha pracesu Anisim całkam ustrymałasia.
Na pytańnie Hihina, ci źbirajecca deputatka jašče sprabavać vyłučacca ŭ prezidenty, Anisim adkazała: «Čas pakaža».
Ciapier čytajuć
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku16
Kamientary