Miadźviedzieŭ pabajaŭsia sapsavać imidž?

Na niefarmalnym samicie ŭ Pieciarburzie novy rasiejski prezydent pahutaryŭ tet-a-tet amal što z usimi kalehami pa SND, akramia biełaruskaha.

Jaŭhienija Vojka z Centru palityčnaj kanjunktury Rasiei (heta analityčnaja struktura ličycca blizkaj da Kramla) miarkuje: pakolki Miadźviedzieŭ dla Zachadu choča vyhladać liberałam, to "z ulikam abvastreńnia biełaruska-eŭrapiejskich stasunkaŭ jon ryzykavaŭ by dezavujavać svoj liberalny imidž u vypadku pieramovaŭ z Łukašenkam" u vačoch udzielnikaŭ mižnarodnaha ekanamičnaha forumu, što raspačaŭsia ŭ Pieciarburzie paralelna.

Pavialičyć

Versija, mahčyma, lje balzam na dušu palityčnym praciŭnikam Łukašenki, ale padajecca zanadta pryhožaj. Novy rasiejski prezydent pahutaryŭ sam-nasam, naprykład, z Karymavym, u jakoha reputacyja na Zachadzie, asabliva paśla andyžanskaj bojni, taksama specyfičnaja. Dyj u šerahu inšych postsavieckich krain demakratyi niahusta. Tak što padychod da kantaktaŭ byŭ, badaj, prahmatyčny. Turkmenistan, Azerbajdžan — heta enerhanośbity, pytańni ich tranzytu, tak što i dla Berdymuchamedava, i dla Alijeva čas u novaha haspadara Kramla znajšoŭsia. Ź inšaha boku, tre' było trochi napružyć Hruziju dy Ŭkrainu. Tamu Saakašvili atrymaŭ mesydž, što NATO jaho nie ŭratuje, a Juščanka — što namier vycisnuć ź Sievastopalu rasiejski flot adhukniecca Kijevu hazam až pa 400 dalaraŭ (bolej, čym płaciać prybałty!) užo z novaha hodu.

Jak bačym, kantakty adbylisia i z perspektyŭnymi, bahatymi naftaju dy hazam partnerami, i z tymi, ź kim Maskva zaraz na nažach. Łukašenka ž na siońnia, jak u toj pieśni Vysockaha, "i nie druh, i nie vrah, a tak". Z bahatymi na enerhanośbity partnerami možna damovicca, prazachodnich vorahaŭ — trochi papałochać, u stasunkach ža Maskvy ź Mienskam pavisła doŭhaja paŭza. Vyhladaje na toje, što rasiejskija elity čakajuć, kab biednaja enerharesursami respublika padzialiłasia tym, što maje. Aktyvami pradpryjemstvaŭ, bankaŭ. Kab puściła ŭ svajo finansavaje ŭłońnie rasiejski rubiel.

Rasiejski palitolah Andrej Rabaŭ biez ekivokaŭ kaža: kamieniem spatyknieńnia stali "pytańni, što tyčacca pravoŭ biełaruskich elitaŭ, jakija ŭznačalili pryvatyzacyju. Tak, naturalna, im nie chaciełasia b zastacca ni z čym na rukach u svajoj ułasnaj krainie. Jany vydatna razumiejuć noravy rasiejskaha biznesu, razumiejuć, što my zabiarem usio".

Tak što Maskva, badaj, nia stolki baicca sapsavać imidž, kolki prymiervajecca, jak jamčej uchapić. Čakaje, kab "klijent saśpieŭ". Ličyć, što čas hulaje na jaje. I asabliva ciažkija časy dla Biełarusi mohuć nastać tady, kali buduć vybityja tranzytnyja kozyry. Truby užo ahinajuć siniavokuju respubliku ź niezhavorlivym kiraŭnictvam.

• 0
• 0
• 0
• 0
• 0
• 0
• 0
• 0