Pa mienšaj miery 17 čałaviek zahinuli pry pažary ŭ składskim pamiaškańni na paŭnočnym uschodzie Maskvy. Kolkaść achviar moža vyraści, bo paviedamlajecca, što niekatoryja z vyratavanych byli dastaŭlenyja ŭ balnicy ŭ ciažkim stanie.
«Padčas tušeńnia pažaru było vyjaŭlenaje pamiaškańnie, adrezanaje ahniom. Pažarnyja prałamali jaho ścianu i znajšli ŭsiaredzinie 16 zahinułych», — paviedamili ahienctvu TASS u pres-słužbie staličnaha hłaŭka MNS. Jašče adna paciarpiełaja pamierła ŭ balnicy.
Śledčy kamitet Rasii raspačaŭ spravu pa fakcie pažaru na składzie i hibieli ludziej. Jak udakładniła aficyjny pradstaŭnik maskoŭskaha hłaŭka SKR Julija Ivanova, sprava raspačataja pa artykule «parušeńnie patrabavańniaŭ pažarnaj biaśpieki» (č. 3 st.219 KK RF).
Interfaks sa spasyłkaj na krynicu ŭ pravaachoŭnych orhanach stalicy paviedamiŭ, što bolšaść zahinułych mierkavana źjaŭlajucca pryjezdžymi z krain SND. Pavodle dadzienych krynicy ahienctva, jašče 20 čałaviek paciarpieli ŭ vyniku pažaru.
Paviedamleńnie ab uzharańni ŭ składskim pamiaškańni pastupiła ŭ MNS kala 8:00 pa maskoŭskim časie. Płošča ŭzharańnia skłała kala 200 kvadratnych mietraŭ.
Raniej MNS paviedamlała pra toje, što z ahniu byli vyratavanyja 12 čałaviek i niekalki čałaviek paciarpieli.
Kamientary