Masavy pikiet BNF u centry Minska ź dziasiatkam nacyjanalnych ściahoŭ FOTAREPARTAŽ
27 lipienia 1990 hoda Viarchoŭny Saviet BSSR pryniaŭ Dekłaracyju ab dziaržaŭnym suvierenitecie Biełarusi. Aktyvisty partyi BNF praviali akcyju kala Płoščy Jakuba Kołasa, utvaryŭšy łancuh ź bieła-čyrvona-biełych ściahoŭ, kab nahadać pra hadavinu pryniaćcia Dekłaracyi.
Ahułam udzielnikaŭ było dva dziasiatki — ludzi trymali nacyjanalnyja ściahi, staŭšy ŭ łancuh pierad Fiłarmonijaj la Płoščy Jakuba Kołasa.
Razam z hetym partyja BNF źbirała podpisy za vyłučeńnie svaich siabroŭ kandydatami ŭ deputaty, a taksama za reabilitacyju piśmieńnicy Łarysy Hienijuš — uklučeńnie jaje tvoraŭ u školnuju prahramu.
Milicyi było ledź nie bolej za pikietoŭščykaŭ. Asoby ŭ cyvilnym zdymali na kamiery navat toje, jak ludzi addajuć svoj podpis za kandydata ad BNF — a takich minakoŭ było niamała.
Adzin z aktyvistaŭ taksama trymaŭ u rukach ściah ZŠA, na pytańnie karespandenta «Našaj Nivy», navošta jon prynios jaho na biełaruski Dzień Niezaležnaści, mužčyna ŭciamna nie adkazaŭ.
Ale ž adzin ź jahonych paplečnikaŭ patłumačyŭ, što ZŠA vystupaje harantam niezaležnaści Biełarusi zhodna z Budapiešckim miemarandumam, a taksama nie pretenduje na našuju terytoryju, jak niekatoryja ŭschodnija susiedzi.
Varta ŭsio ž dadać, što minaki ŭsprymali amierykanski ściah nie vielmi pryjazna.
Ahułam lidar partyi BNF Alaksiej Janukievič acaniŭ akcyju pazityŭna, skazaŭšy, što dobraje nadvorje i čas paspryjali tamu, kab nacyjanalnuju simvoliku na vulicach Minska ŭbačyła jak maha bolej ludziej.
Taksama Janukievič zaznačyŭ, što ciaham hetaj vybarčaj kampanii šerahi BNF pačali poŭnicca ludźmi, jakija vykazvajuć žadańnie zapisacca ŭ partyju, prosta padychodziačy da pikietaŭ na vulicach.
«Pieramieny mahčymyja, treba pavieryć u heta, a nie čakać, pakul chtości pryjdzie i za vas štości zrobić», — padsumavaŭ lidar BNF.
Kamientary