Biełarusam pry naviedvańni Polščy rekamiendujuć zaŭsiody mieć pry sabie dakumienty

Biełaruskim turystam u bližejšy miesiac rekamiendujuć pry naviedvańni Polščy zaŭsiody mieć pry sabie dakumienty. Adpaviednyja rekamiendacyi raźmieščanyja na sajcie Nacyjanalnaha ahienctva pa turyźmie ŭ suviazi z časovym uviadzieńniem kantrolu na miežach u Polščy.

Pamiežny kantrol uviedzieny z 4 lipienia pa 2 žniŭnia ŭ suviazi z praviadzieńniem samitu NATA (8-9 lipienia) i Suśvietnych dzion moładzi (ich asnoŭnyja mierapryjemstvy projduć 26-31 lipienia). Na polska-niamieckaj, polska-češskaj, polska-słavackaj, polska-litoŭskaj miežach, a taksama ŭ aeraportach i marskich partach mahčymy kantrol najaŭnaści ŭ biełaruskich hramadzian dakumientaŭ, jakija paćviardžajuć prava ŭjezdu na terytoryju Polščy.

«Hramadzianie Biełarusi pavinny być hatovyja nie tolki pradjavić pašpart i inšyja dakumienty, jakija dajuć dazvoł na ŭjezd na terytoryju Polščy, ale i rastłumačyć u vypadku nieabchodnaści metu ŭjezdu, pradjavić dokaz najaŭnaści srodkaŭ na znachodžańnie ŭ krainie. Kantrol budzie pravodzicca vybaračna i moža ažyćciaŭlacca nie tolki pry pierasiačeńni miažy, ale i ŭnutry Polščy», — adznačyli ŭ Nacahientstvie pa turyźmie.

U ciapierašni čas adznačajucca vypadki prybyćcia ŭ Polšču biełaruskich hramadzian, jakija stracili dakumienty ŭ inšych dziaržavach Šenhienskaha pahadnieńnia. Jak praviła, naziemnym šlacham jany prybyvajuć z Hiermanii i Čechii, pavietranym — z kurortnych rehijonaŭ Ispanii. Asobnyja hramadzianie, atrymaŭšy vizu ŭ litoŭskim dyppradstaŭnictvie abo konsulskaj ustanovie, ujazdžajuć u Polšču praz terytoryju Litvy.

Polskija pravaachoŭnyja orhany taksama vyjaŭlajuć hramadzian Biełarusi, jakija majuć roznaha rodu dazvoły na znachodžańnie, vydadzienyja inšymi dziaržavami — udzielnikami Šenhienskaha pahadnieńnia. Adznačajecca, što takija dazvoły nie dajuć prava vyjezdu z terytoryi krainy znachodžańnia ŭ inšyja dziaržavy šenhienskaj zony.

Nacahientstva pa turyźmie sa spasyłkaj na ambasadu Biełarusi ŭ Polščy taksama paviedamlaje, što na miažy z krainami šenhienskaj zony płanujecca razharnuć patruli Pahraničnaj varty, jakija vykarystoŭvajuć mabilnyja terminały pamiežnaha kantrolu i aŭtamabili (tak zvanyja «šenhienobusy») sa śpiecyjalnym abstalavańniem i dostupam da baz dadzienych, jakija dazvalajuć praviadzieńnie pamiežnaha kantrolu za punktam propusku. Dla praviadzieńnia pamiežnaha kantrolu pryciahnuta kala 1,5 tysiačy słužačych. U dziejučych punktach propusku płanujecca ŭvieści asobnyja pałosy ruchu dla pałomnikaŭ, jakija prybyvajuć dla ŭdziełu u Suśvietnych dniach moładzi.

• 0
• 0
• 0
• 0
• 0
• 0
• 0
• 0