Palicyja ŭ pakistanskim horadzie Łachor aryštavała žančynu, jakuju padazrajuć u zabojstvie svajoj dački, jakaja vyjšła zamuž biez dazvołu svajoj siamji.
Pavodle dadzienych palicyi, Ziinat Rafik pryviazali da łožka, paśla čaho ablili bienzinam i padpalili.
Maci dziaŭčyny abvinavačvajuć u tym, što dla hetaha jana padmanam pryviała dačku ŭ svoj dom, zabraŭšy jaje z chaty baćkoŭ muža.
Za miesiac heta treci padobny vypadak hvałtoŭnaj śmierci ŭ Pakistanie, kali dziaŭčyna była spalenaja z-za roznahałośsiaŭ sa svajakami abo supołkaj pa pytańniach šlubu.
Na minułym tydni stała viadoma pra śmierć 19-hadovaj nastaŭnicy Maryi Sadakat, jakaja admoviłasia vyjści zamuž za syna ŭładalnika škoły. Pavodle źviestak palicyi, piaciora nieviadomych zajšli ŭ dom nastaŭnicy, kali jaje baćkoŭ nie było doma, źbili dziaŭčynu, a potym ablili jaje bienzinam i padpalili. Dziaŭčyna pamierła ŭ balnicy ŭ Isłamabadzie.
Miesiacam raniej u adnoj ź viosak, pa rašeńni starejšyn, była spalenaja 16-hadovaja dziaŭčyna za toje, što jana dapamahła svajoj siabroŭcy źbiehčy ź vioski i tajemna vyjści zamuž. Palicyja paśla zabojstva dziaŭčyny aryštavała jaje maci i kiraŭnika rady starejšyn. Svajaki, pavodle dadzienych palicyi, pahadzilisia z vyniesienym dziaŭčynie radaj starejšyn prysudam.
U Pakistanie achviarami zabojstvaŭ, jakija ździajśniajucca ź mierkavańniaŭ «abarony honaru», pavodle źviestak pravaabaroncaŭ, štohod stanoviacca kala tysiačy žančyn.
Ciapier čytajuć
«Ženia pahadziŭsia na budoŭlu, a nie vajavać. I tolki kali vyjdzie z zapoju!»: jak pradali ŭ rasijskuju armiju žychara Lozna. Achviara nie adna3
Kamientary