Kamitetam dziaržaŭnaj biaśpieki zatrymanyja bujnyja ašukancy — hramadzianie Armienii, Biełarusi i paddany Šviecyi.
U dačynieńni da zatrymanych raspačatyja kryminalnyja spravy pa č. 4 art. 209 KK (machlarstva) i č. 2 art. 431 KK (dača chabaru). Sankcyi artykułaŭ praduhledžvajuć pakarańnie ŭ vyhladzie pazbaŭleńnia voli terminam ad 2 da 15 hadoŭ.
Jak paviedamlaje pres-słužba KDB, 26 krasavika była spynienaja złačynnaja dziejnaść paddanaha Šviecyi i hramadzianina Armienii. Pazicyjanujučy siabie asobami, jakija vałodajuć suviaziami ŭ KDB, Śledčym kamitecie i siarod vysokich słužbovych asobaŭ dziaržavy, jany prapanavali biełaruskamu hramadzianinu vyrašyć pytańnie, źviazanaje z rasśledavańniem kryminalnaj spravy, jakaja znachodzicca ŭ vytvorčaści adnaho z padraździaleńniaŭ Śledčaha kamiteta.
Zahadzia nie majučy namieru vykonvać pryniatyja na siabie abaviazacielstvy i nie majučy takoj mahčymaści, ašukanskim sposabam zavałodali hrašovymi srodkami biełarusa ŭ pamiery 335.000 dołaraŭ ZŠA i juvielirnymi ŭpryhažeńniami bolš jak na 150.000 dołaraŭ ZŠA. Ahulnaja suma za akazanyja nibyta pasłuhi pavinna była skłaści 1,5 młn. dołaraŭ ZŠA. Adnak davieści da kanca svoj złačynny namier zamiežniki nie zmahli, bo byli zatrymanyja i źmieščanyja pad vartu.
U rečaisnaści šviedskim paddanym źjaŭlajecca hramadzianin Afhanistana, jaki ŭ statusie biežanca znachodziŭsia na terytoryi Biełarusi ŭ pieryjad z 1999 pa 2004 hady pad inšymi ankietnymi danymi. U kastryčniku 2004 hoda jon pakinuŭ Biełaruś, a ŭ śniežni ŭžo ŭjechaŭ pad inšymi danymi, na jakija im ašukanskim šlacham byŭ atrymany šviedski pašpart. Takim čynam, uhledžvajecca ŭčynieńnie im supraćpraŭnych dziejańniaŭ nie tolki ŭ Biełarusi, ale na terytoryi Šviecyi.
Taksama 3 maja apieratyŭnymi padraździaleńniami KDB byŭ zatrymany hramadzianin Biełarusi, jaki nieadnarazova padbuchtorvaŭ namieśnika dyrektara kamiercyjnaj struktury da davańnia chabaru słužbovym asobam administracyi adnaho z rajonaŭ Minska, a taksama kiraŭnictvu Minskaha haradskoha vykanaŭčaha kamiteta. Hrošy byli nieabchodnyja za nibyta spryjalnaje vyrašeńnie pytańnia ŭ atrymańni dazvołu na prajektavańnie i budaŭnictva žyłoha doma. Pry hetym jon realna nie mieŭ mahčymaści ŭrehulavać prablemu i nie mieŭ navat apasrodkavanych kantaktaŭ sa słužbovymi asobami.
Svaje pasłuhi zatrymany acaniŭ u 20.500 dołaraŭ ZŠA, jakija pavinny byli im atrymlivacca paetapna pa miery vyrašeńnia pytańniaŭ z pradstaŭnikami dziaržaŭnych orhanaŭ. Machlara zatrymali paśla atrymańnia pieršaha płaciažu ŭ sumie 8.000 dołaraŭ ZŠA.
Da zatrymanych prymienienaja miera strymańnia ŭ vyhladzie zaklučeńnia pad vartu.
Kamientary