Nina Bahinskaja: Hod kultury. Ale jakoj?

2016 hod byŭ abvieščany Hodam kultury. Uvieś studzień u mianie byli dobryja adčuvańni. Na praciahu 2015-ha hoda ŭ mianie nie ŭźnikła anijakich prablem. Navat spahnańnie, što było praduhledžana sudom Centralnaha rajona h. Minska ŭ pamiery 3 młn 600 tysiač rubloŭ za ŭdzieł va ŭšanavańni pamiaci Michasia Žyźnieŭskaha da ŭhodak sa dnia śmierci la pomnika Šaŭčenki, było skasavana. I na 5-ch uhodkach avijakatastrofy pad Smalenskam, kali hramadskaść vyraziła spačuvańnie ŭ malitvie la Čyrvonaha kaścioła, mianie zatrymała milicyja sa ściaham, ale da suda sprava nie dajšła i ściah viarnuli.

Pavialičyć

I kali ŭ navahodniuju noč na 2016 hod ja išła pa praśpiekcie ad Akademii navuk da płoščy Niezaležnaści ź bieł-čyrvona-biełym ściaham na radaść šmatlikim minakam i mianie milicyjanty nie pakarali, ja była ŭpeŭniena, što ŭ Hod kultury ściah, nakštałt hierba «Pahonia», budzie abvieščany ŭładami histaryčnaj, kulturnaj kaštoŭnaściu.

I kali 18 studzienia na akcyi ŭ padtrymku pradprymalnikaŭ na mianie byŭ składzieny pratakoł za «publičnuju diemonstraciju fłaha», ja była ŭpeŭniena, što karać mianie za ściah užo anichto nie budzie. Ech… Nie kažy «hop», pakul nie pieraskočyš. Hod kultury. Ale jakoj? Jakaja kultura zapanuje ŭ Hod kultury? U lutym maje dobryja adčuvańni skončylisia.

Karniki haspadarać nad kulturaju.

30 studzienia ja pryjšła da Viarchoŭnaha suda padtrymać maładych ludziej, źbitych u sudzie Frunzienskaha rajona. Milicyja znoŭ pačała składać pratakoły. Mianie ŭ RUUS Leninskaha rajona ŭžo nie vyklikali — pratakoł prysłali pa pošcie, dzie znoŭ pačali ckavańnie za ściah: «stojała s fłahom bieło-krasno-biełych ćvietov, čiem narušiła ustanovlennyj poriadok». Sud Leninskaha rajona prysudziŭ štraf — 25 bazavych.

Tut milicyjanty z RUUSa Maskoŭskaha rajona schamianulisia, što nie padali na mianie ŭ sud, kali ja 18 studzienia «publično diemonstrirovała fłah», i padali na mianie ŭ Maskoŭski sud. 17.02 sud Maskoŭskaha rajona pa takoj ža farmuloŭcy, što i Leninski, prysudziŭ mnie 30 bazavych vieličyń.

Pratakoły ŭ RUUSach i pastanovy ŭ sudach pišuć pad kapirku. Pišuć pa-rasiejsku.

Biudžet pusty, a hrošy, źniatyja ź ludziej, u sistemie kruciacca, napaŭniajuć i zabiaśpiečvajuć isnavańnie siłavikoŭ, sudoŭ, prakuroraŭ.

Ale art. 58 Kanstytucyi nie zabaraniaje hramadskija schody, zvaroty. Nie zabaronieny zakonam i naš bieł-čyrvona-bieły ściah.

U 2015 čynoŭniki trochi ścichli pierad vybarami prezidenta, nie žadali psavać adnosiny ź Jeŭrapiejskim Sajuzam. A ciapier my znoŭ kocimsia navat nie na ŭschod, a ŭ jamu.

U pamiaci vieršy Anatola Sysa:

I pryjšli-prybiehli katy,
nackavali hruhanoŭ,
jak sabak,
na pieśniu ptacha,
na buntarny śpieŭ zvanoŭ.

I pryjšli-prybiehli sudździ,
abviaścili svoj prysud:
bić, pakul nie tresnuć hrudzi,
bić, pakul nie ŭklenčyć lud!..

Vieru, jak skanaŭ SSSR, tak i ciapierašniaja niespraviadlivaść skončycca.

• 0
• 0
• 0
• 0
• 0
• 0
• 0
• 0