Žychary minskaha mikrarajona Masiukoŭščyna sabrali 2.700 podpisaŭ suprać uščylnieńnia zabudovy
Žychary Masiukoŭščyny sabrali 2.700 podpisaŭ suprać uščylnieńnia zabudovy mikrarajona ŭ ramkach hramadskaha abmierkavańnia prajekta detalovaha płanavańnia (PDP) u miežach vulica Łyńkova — vulica P.Hlebki — prajezd Masiukoŭščyna — kamunalnaja zona.
Jak paviedamiŭ kaardynatar kampanii «Hienpłan — dla minčan!» Dzianis Kobrusieŭ, kalektyŭny zvarot i podpisy byli nakiravanyja 21 krasavika ŭ administracyju Frunzienskaha rajona Minska, kamitet architektury i horadabudaŭnictva Minharvykankama i UP «Minskhrada».
Hramadskaje abmierkavańnie prajekta prachodziła z 28 sakavika pa 21 krasavika. Zhodna z prajektam, vyniesienym na abmierkavańnie, płanavałasia pavialičyć žyłuju terytoryju z 23,7 da 60,6 ha, kolkaść žycharoŭ pavinna vyraści z 8,4 tys. da 17,6 tys., zapłanavanaje budaŭnictva treciaha transpartnaha kalca pamiž vulicami P.Hlebki i Cimašenki, a taksama pavieličeńnie terytoryi vytvorčaj zony.
Žychary mikrarajona vystupili suprać płanaŭ haradskich uładaŭ i ŭ kalektyŭnym zvarocie prapanujuć ich źmianić. U pryvatnaści jany zaklikali: źmienšyć abjomy zabudovy žyłoha i hramadskaha fondu, zapłanavanaha da raźmiaščeńnia na terytoryi ŭ miežach PDP; vyklučyć treciaje transpartnaje kalco pamiž vulicami P.Hlebki i Cimašenki, u tym liku raźviazku na vulicy Cimašenki; vyklučyć zaprajektavanyja vulicy, jakija pavinny prajści cieraz žyłyja kvartały, a taksama nie pašyrać vulicu Łyńkova; vyklučyć ŭščylnieńnie sfarmavanych žyłych kvartałaŭ 16-paviarchovymi damami. Jany taksama prapanujuć nie pavialičvać terytoryju vytvorčaj zony, a novyja vytvorčyja abjekty budavać u miežach užo isnaj pramzony i nie pieravodzić žyłyja damy ŭzdoŭž čyhunki ŭ administracyjnyja.
«U pieršuju čarhu aburyŭ padychod arhanizataraŭ da padrychtoŭki hramadskaha abmierkavańnia, skłałasia ŭražańnie, što arhanizatary chacieli pravieści kułuarnaje abmierkavańnie prajekta, nie pryciahvajučy ŭvahi žycharoŭ mikrarajona. Pry detalovym razhladzie eskiza prajekta byli vyjaŭlenyja istotnyja parušeńni architekturna-budaŭničych normaŭ», — ličyć udzielnik inicyjatyŭnaj hrupy Alaksandr Bachar.
«Skłałasia ŭražańnie, što raspracoŭščyki hetaha prajekta nie naviedvali mikrarajon pry praviadzieńni prajektnych rabot. Takim čynam, padadzieny ŭ takim vyhladzie prajekt nie moža razhladacca jak pierśpiektyŭny i patrabuje detalovaj pierapracoŭki ŭ adpaviednaści narmatyŭnymi dakumientami. Dla taho kab raspracavać hety prajekt, byli vydatkavanyja biudžetnyja srodki, atrymanyja ŭ tym liku z padatkaŭ, što vypłačvajuć žychary mikrarajona. Zaraz žycharam davodzicca marnavać svoj asabisty čas dla taho, kab źbirać podpisy i chadzić pa instancyjach, dakazvajučy vidavočnuju nieabhruntavanaść hetaha prajekta», — adznačyŭ aktyvist.
Na dumku Kobrusieva, «hramadskaje abmierkavańnie i reakcyja miascovych žycharoŭ na płany haradskich uładaŭ pakazali, što praktyka prajektavańnia raźvićcia haradskich terytoryj biez papiaredniaha uliku mierkavańnia miascovych žycharoŭ, ich intaresaŭ i pažadańniaŭ časta pryvodzić da kanfliktaŭ i supraćstajańnia haradžan i haradskoj administracyi. I kab horad byŭ zručnym i kamfortnym dla žyćcia haradžan, hetuju praktyku treba mianiać».
Kamientary