«Ruski śviet» u našych dumkach i dušach»: Kiebič napisaŭ knihu z tłumačeńniem, čamu treba lubić Rasiju
Były premjer-ministr Biełarusi Viačasłaŭ Kiebič praciahvaje vydavać knihi. Raniej byli apublikavanyja jahonyja ŭspaminy «Spakusa ŭładaj» i «Biełaviežski hambit». Novaja kniha nazyvajecca «Ci lubim my Rasiju?». U naźvie praduhledžvajecca pytańnie, ale ŭsie 500 staronak aŭtar paśladoŭna davodzić, što praŭdzivy, spraviadlivy i histaryčna dakładny adkaz moža musić tolki adzin: «Tak!»
Kniha vyhladaje jak pierakaz historyi Biełarusi z kamientarami Kiebiča. Niepaśladoŭny, drenna strukturavany, z tendencyjnym padboram faktaŭ i terminałohijaj nibyta z prahram Dźmitryja Kisialova.
Pryvodzim zachaplalnyja vytrymki z knihi.
«Suprać Rasii i tych respublik, što ciahnucca da jaje, razam z sankcyjami, jakija zaklikanyja abiaskryvić ich ekanomiku, viadziecca masiravanaja psichałahičnaja apracoŭka nasielnictva … Razvał SSSR i nacyjalistyčnaja vakchanalija dy rusafobija, jakija apanavali značnuju jaho terytoryju, – vynik psichałahičnaj vajny i infarmacyjnaha abałvańvańnia miljonaŭ ludziej».
* * *
«Karystajučysia svabodaj słova i niekatoraj pabłažlivaściu z boku dziaržavy, biełaruskija nacyjanalisty ŭžo ŭ adkrytuju nazyvajuć rasijan nie inačaj jak kałanizatarami».
* * *
«U vyniku prapahandysckaj vakchanalii … ułady admovilisia ad ustanoŭki pomnikaŭ Volzie i Alaksandru Nieŭskamu. Uzamien im i źjaviŭsia pomnik Alhierdu … A kab jaho biełaruskaść ni ŭ koha nie vyklikała sumnievaŭ, uziali i źlohku padkarektavali imia kniazia — zamiest «Olhierda» nazvali «Alhierdom».
* * *
«Imknučysia zhańbić imia vybitnaha pałkavodca, biełarusisty pajšli na adkrytuju chłuśniu … Nazyvajučy Alaksandra Suvorava katam biełaruskaha naroda, patrabujučy źnieści ŭstanoŭlenyja jamu pomniki, začynić muziej, pierajmienavać suvoraŭskuju vučelniu, apazicyja ničym nie paćviardžaje nibyta ździejśnienyja im złačynstvy. Atrymlivajecca, što adzinaj jaho vinoj źjaŭlajecca padaŭleńnie paŭstańnia Tadevuša Kaściuški».
* * *
«Nacyjanalisty tłumačać situacyju vielmi prosta: zaniapad biełaruskaj movy — vynik hvałtoŭnaj rusifikacyi, jakaja pravodziłasia ŭsie 70 hadoŭ savieckaj ułady. Pry hetym nijakich dokazaŭ nie pryvodzicca. U 1920-yja kamisary, viadoma ž, pravodzili charčraźviorstku, vykałačvajučy ź sialanaŭ apošnich chleb, ssyłajučy ich u Sibir. Ale voś kab jany ź pistaletam u rukach prymušali ludziej razmaŭlać pa-rusku, nie mahu pavieryć».
* * *
«Nie było hvałtoŭnaj rusifikacyi! Chutčej naadvarot, realizujučy nacyjanalnuju prahramu, savieckaja ŭłada imknułasia padtrymlivać movy karennych narodaŭ».
* * *
«Viarchoŭny saviet BSSR pryniaŭ Zakon ab movach, u adpaviednaści ź jakim biełaruskaja mova była abvieščanaja dziaržaŭnaj … Atrymaŭšy takuju pravavuju asnovu, Biełaruski narodny front pavioŭ masiravanuju ataku na ruskuju movu. Pa prykładzie inšych krain ad čynoŭnikaŭ stali patrabavać razmaŭlać na nacyjanalnaj movie, tych, chto admaŭlaŭsia rabić heta, publična beścili… Kali b sprava pajšła tak i dalej, napeŭna, nieŭzabavie pačali b danosić na tych, chto ŭ hramadskich miescach razmaŭlaje pa-rusku! Heta zusim nie tryźnieńnie, jak moža padacca».
* * *
«Termin «Biełaruś» źjaŭlajecca pałanizavanym varyjantam spradviečnaha najmieńnia «Biełaja Ruś».
* * *
«Ziemli, dałučanyja da Rasii pa žadańni narodaŭ, jakija ich nasialali — Baškiryja, Kazachstan, Hruzija, Armienija, Tuva, Asiecija, Ukraina».
* * *
«Paŭsiul i va ŭsie časy znachodziacca psichična niezdarovyja ludzi, jakija abjaŭlajuć siabie napaleonami i inšymi dyktatarami … Bijahrafii staršyniaŭ Rady BNR nie pakidajuć sumnievaŭ — usie hetyja ludzi byli pierakananymi antysavietčykami i ich sapraŭdnyja mety dalokija ad tych, što zajaŭlajuć jany, znachodziačy pad pratektaram zachodnich śpiecsłužb».
* * *
«Biełaruski narod hanarycca tym, što jamu daviałosia być «zapaviednikam sacyjalizmu», zachavalnikam viečnych maralnych kaštoŭnaściaŭ. Nadydzie toj dzień, ja ŭ hetym nie sumniajusia, kali da hetaj žyvatvornaj krynicy prytulacca ŭsie tyja, chto, adurmanieny mijazmami kapitalizmu, paśpiašaŭsia adračysia ad savieckaha minułaha».
* * *
«Aścierahacca prychodu «ruskaha śvietu» ŭ Biełaruś niama nijakaha rezonu. Jon daŭno ŭžo tut. U našych dumkach. U našych dušach. U našym ładzie žyćcia».
«Ženia pahadziŭsia na budoŭlu, a nie vajavać. I tolki kali vyjdzie z zapoju!»: jak pradali ŭ rasijskuju armiju žychara Lozna. Achviara nie adna6
Kamientary