Letaś u Biełarusi było adłoŭlena 69 tysiač biazdomnych žyvioł, paviedamiła kansultant upraŭleńnia žyllovaj haspadarki Ministerstva žyllova-kamunalnaj haspadarki Vijaleta Andryjanava 18 krasavika na pres-kanfierencyi ŭ Minsku.
Pry hetym jana nie zmahła adkazać na pytańnie, jakaja častka z hetych žyvioł zastałasia ŭ žyvych i była pieradadzienaja novym uładalnikam. «Kali jość mahčymaść, nichto [žyvioł] nie źniščaje. Paviercie, heta nie samyja žorstkija ludzi, napeŭna, naadvarot, čullivyja — tyja, chto pracuje i sprabuje niešta rabić i niejak abaranić hetych žyvioł», — skazała Andryjanava.
Pavodle słoŭ dyrektara dziaržpradpryjemstva «Faŭna horada» Tamary Carykoŭskaj, u Minsku ŭ 2015 hodzie było adłoŭlena kala 4 tysiač žyvioł, ź jakich kala 3 tysiač znajšli novy dom. «Pryčym ciapier niama abmiežavańniaŭ, i ŭ nas jość žyvioły, jakija čakajuć novych uładalnikaŭ i miesiacy, i dva», — zaznačyła jana.
Jak patłumačyła Carykoŭskaja, ciapier u pałažeńni ab paradku adłovu i ŭtrymańnia bieznahladnych žyvioł vyznačana, što na praciahu piaci dzion paśla pastupleńnia sabak abo katoŭ u punkt časovaha ŭtrymańnia viadziecca pošuk ich starych uładalnikaŭ, paśla čaho žyvioły pierachodziać va ŭłasnaść punkta, i ich mohuć addać novym uładalnikam abo ŭsypić. Zakonaprajekt «Ab abychodžańni z žyviołami», što raspracoŭvajecca ŭ Biełarusi, pavialičvaje hety termin da 14 dzion. U hety pieryjad žyviołu moža zabrać novy ŭładalnik, ale, kali abjavicca pieršapačatkovy haspadar sabaki ci kata, jon abaviazany budzie viarnuć hadavanca.
Varta adznačyć, što punkty časovaha ŭtrymańnia žyvioł jość nie va ŭsich biełaruskich haradach, i zoaabaroncy nieadnarazova źviartali ŭvahu na toj fakt, što ŭ rehijonach biazdomnyja i zhublenyja žyvioły čaściakom źniščajucca na miescy, pryčym nie zaŭsiody humannymi sposabami. Zakonaprajekt «Ab abychodžańni z žyviołami» praduhledžvaje stvareńnie takich punktaŭ u rajonnych centrach, a pry nieabchodnaści — i ŭ bolš drobnych nasielenych punktach.
«Ženia pahadziŭsia na budoŭlu, a nie vajavać. I tolki kali vyjdzie z zapoju!»: jak pradali ŭ rasijskuju armiju žychara Lozna. Achviara nie adna6
Kamientary