Supracoŭniki pahransłužby FSB Rasii pa Smalenskaj vobłaści sumiesna z pradstaŭnikami Smalenskaj mytni 12 sakavika vykryli kanał nielehalnaj pastaŭki pradukcyi žyviołahadoŭli ź Biełarusi ŭ RF.
Jak paviedamiła pamočnik kiraŭnika ŭpraŭleńnia Raśsielhasnahladu pa Branskaj i Smalenskaj abłaściach Śviatłana Ziamčankova, niedaloka ad biełaruska-rasijskaj miažy byŭ spynieny maršrut vialikahruznaha tentavaha transpartnaha srodku, jakim kiravaŭ hramadzianin Biełarusi.
Vyśvietliłasia, što niepryznačany dla transparciroŭki charčovych praduktaŭ aŭtamabil razam z hazavanaj vadoj pieravoziŭ 8 t syru vytvorčaści Kapylskaha filijała AAT «Słucki syrarobny kambinat».
«Za apošni čas heta ŭžo nie pieršy vypadak ŭvozu žyviołahadoŭčaj pradukcyi pad vyhladam tavaraŭ prykryćcia na hetym učastku», — kanstatavała pradstaŭnik Raśsielhasnahladu.
Jana raspaviała, što, pakolki vieterynarna-supravadžalnych dakumientaŭ na charčovuju pradukcyju pieravozčyk nie pradstaviŭ, hruz ŭ miežach kampietencyi pieradali ŭpraŭleńniu Raśsielhasnahladu pa Branskaj i Smalenskaj abłaściach.
U chodzie dalejšych administracyjnych pracedur inśpiektary vyjavili, što pieravozčykam hazavanaj vady i syru było biełaruskaje pryvatnaje pradpryjemstva «SV Trans».
U dakumientach było zajaŭlena, što aŭtatranspartny srodak uvozić u RF ź Biełarusi napoj u kolkaści 10 paddonaŭ ahulnaj vahoj kala 8 t. Pahruzka ažyćciaŭlałasia 11 sakavika ŭ Minsku, miescam razhruzki źjaŭlajecca Maskva biez dalejšaj adrasnaj detaliroŭki. Hruzaadpraŭnikom i adnačasova hruzaatrymalnikam značyŭsia adzin i toj ža indyvidualny pradprymalnik.
Adnačasova, pavodle druhoha kamplekta dakumientaŭ, da ŭvozu byŭ zajaŭleny kruchmał ŭ rossypy vahoj 7,5 t. Pahruzka taksama ažyćciaŭlałasia 11 sakavika ŭ Minsku, a miescam razhruzki taksama značycca Maskva biez dalejšaj adrasnaj detaliroŭki. Adnak hruzaadpraŭščykam źjaviłasia ŭžo biełaruskaje PTUP «Ilmień Plus», a atrymalnikam — TAA «MKŁ-HRUP», zasnavalnikam jakoha źjaŭlajecca hramadzianin Biełarusi.
«Takim čynam, pieravozčyk zaviedama mieŭ infarmacyju pra svaju niezakonnuju dziejnaść», — kanstatavała Ziemčankova.
Pryčynu takich dziejańniaŭ biełaruskaha boku jana patłumačyła tym, što z sakavika hetaha hoda z pryčyny sistematyčnaha vyjaŭleńnia ŭ syrach pieravyšeńnia masavych dolaŭ kansiervanta Raśsielhasnahlad byŭ vymušany ŭvieści zabaronu na pastaŭki małočnaj pradukcyi ŭ RF dla ŭsich filijałaŭ Słuckaha syrarobnaha zavoda.
Na partyju syru «Rasijski novy» vahoj kala 8 t, vyrablenaha Kapylskim filijałam AAT «Słucki syrarobny zavod», nakładzieny administracyjny aryšt. Pradukt budzie utylizavany.
Ciapier čytajuć
Kala Safii ŭ Połacku pastavili pomnik lotčykam Ničyparčyku i Kukanienku. Ale navat nie samalot toj madeli, na jakoj jany zahinuli, a aerapłan stalinskaha času2020
Kamientary