«Kantora» kino zdymaje» — jak sprabujuć skampramietavać mahiloŭskaha sacyjał-demakrata Ihara Barysava
10 sakavika na jutubie źjaviŭsia rolik pra namieśnika staršyni Biełaruskaj sacyjał-demakratyčnaj partyi Ihara Barysava. Zalita videa z fejkavaha akaŭntu «Lova z Mahilova».
Nieviadomy aŭtar sprabuje skampramietavać Barysava. U kadry źjaŭlajucca nie nadta pryvabnyja zdymki Ihara, a taksama nibyta raśpiski na atrymańnie hrošaj. Raniej takija filmy pra aktyvistaŭ apazicyi časta demanstravali na dziaržaŭnych telekanałach. Ciapier ža prosta «vykidvajucca» ŭ internet.
«Hod tamu supracoŭniki milicyi kanfiskavali ŭ mianie kampjutar, na jakim i byŭ archiŭ fotazdymkaŭ za apošnija 10 hadoŭ. Tady milicyja vyśviatlała, ci nie ja abraziŭ u artykule adnaho dyrektara mahiloŭskaha pradpryjemstva. Sprava skončyłasia, da mianie nijakich pretenzij niama.
U pačatku lutaha skončyłasia pravierka, jakuju suprać mianie pravodzili padatkaviki – nijakich pretenzij da mianie jany nie majuć. Ja nie bajusia, bo ja čysty. U procilehłym vypadku siadzieŭ by ŭžo jak Bialacki.
Heta staryja mietady kampramietacyi, adpracavanyja ŭžo šmat hadoŭ. Miascovaja «kantora» kino zdymaje. Jość jašče ŭ Mahilovie adzin taki sajt, dzie ja pastajanny hieroj. Pisali tam niadaŭna, što ŭ mianie try kvatery, u tym liku ŭ Vilni, supieraŭtamabil. Usio heta tryźnieńni.
Ciapier heta aktyvizavałasia pierad źjezdam BSDP, jaki adbudziecca ŭ niadzielu. Napeŭna, kamuści vielmi chočacca, kab partyja prahnułasia pad «Havary praŭdu», a nie praciahvała demakratyčnaje raźvićcio», — skazaŭ Ihar Barysaŭ u kamientary «NN».
Ihar Barysaŭ naradziŭsia ŭ 1982 u Mahilovie. Skončyŭ Biełaruska-Rasijski univiersitet (Mahiloŭ) i Jeŭrapiejski humanitarny ŭniviersitet (Vilnia). Maje dypłomy inžyniera-elektryka i palitołaha. Mahistr palityčnych navuk. Ad 2001 hoda ŭ BSDP. Ad 2010 – namieśnik staršyni BSDP. Redaktar sajta «Naš Mahiloŭ».
Kamientary