Piarcoŭka patencyjnaha praciŭnika dobra raźviazvaje jazyk! :)

Zachad zdaŭ Pucina ŭkraincam :) Kijeŭ atrymaŭ stenahramu zakrytaha pasiedžańnia samitu NATO ŭ Buchareście.

Dahetul razmovy pra toje, što rasiejski prezydent pakryŭdziŭ ukraincaŭ, hruntavalisia na volnym pierakazie jahonych tezaŭ. Maskva ŭsio adkidała jak pravakacyjnuju chłuśniu. Stenahrama śviedčyć, što Ŭładzimier Uładzimieravič usio ž nachamutaŭ. Biazbožna zavysiŭ dolu etničnych rasiejcaŭ u susiedniaj krainie (zamiest 17% skazaŭ: 17 miljonaŭ!), advolna traktavaŭ krymskaje pytańnie, zaznačyŭ, što "poŭdzień Ukrainy całkam, tam tolki adny rasiejcy". Narešcie, zrabiŭ šerah ryzykoŭnych namiokaŭ terytaryjalnaha kštałtu…

Reč nia ŭ tym, što pamočniki padsunuli nia tyja ličby dy fakty. U hetym śpičy prarvałasia sapraŭdnaje staŭleńnie rasiejskaha isteblišmentu da ŭkrainskaj niezaležnaści. Dyplamatyčnyja ramki prymušajuć jašče padšukvać bolej-mieniej palitkarektnyja farmuloŭki, kštałtu: Ukraina jość zonaju našych stratehičnych intaresaŭ. Ale kali adbyvajucca takija voś emacyjnyja vykidy, jak u Pucina ŭ Buchareście, to lišni raz pierakonvajeśsia, što ŭ padkorcy maskoŭskich kiraŭnikoŭ tryvała siadzić pierakanańnie: "Małorośsija" nijakaja nie dziaržava, jaje nasielniki — nijakaja nia nacyja, i ŭsia hetaja "samostijnosť" — tolki histaryčnaje nieparazumieńnie.

Ci treba davodzić, što hetakaje staŭleńnie jašče macniej ekstrapalujecca na Biełaruś? Tym bolej što ŭ hetym vypadku i arytmetykaj etničnaj rasiejskaści manipulavać niama patreby. Samo tutejšaje načalstva achvotna pryznaje miascovaje nasielnictva składnikam "adzinaha narodu", abo, u lepšym vypadku, "rasiejcami sa znakam jakaści".

Šerah našych analitykaŭ miarkujuć, što ruch Ukrainy ŭ NATO vyhadny aficyjnamu Miensku. Maŭlaŭ, na hetym tle ŭ vačoch Kramla padvyšajecca kaštoŭnaść vajskova-stratehičnaha chaŭrusu ź Biełaruśsiu i jaje kiraŭnictva atrymlivaje šaniec vyhandlavać praciah preferencyjaŭ.

Mnie ž padajecca, što abiacańnie "lehčy pad tanki NATO" ŭžo dastatkova devalvavanaje. I Maskva, badaj, va ŭsio bolšaj stupieni budzie kiravacca mierkavańniem "kudy jon dzieniecca z padvodnaj łodki?". Tak što źnižak nadta nie daduć, a voś u svaju arbitu jašče macniej uciahnuć.

Miž tym nataŭski trend Ukrainy ŭžo adhukajecca. Pratačylisia źviestki, što naša Ministerstva abarony raspracoŭvaje abmiežavańni dla aficeraŭ dy inšych słužboŭcaŭ, datyčnych da roznych sakretaŭ, u pytańni vyjezdu na Ŭkrainu. Viedama ž, piarcoŭka "patencyjnaha praciŭnika" dobra raźviazvaje jazyki! :)

Pavialičyć

Kali ž całkam surjozna, to z hledzišča ajčynnaha kiraŭnictva — vakoł Biełarusi ŭtvarajecca padkova "varožaha atačeńnia". Adziny adkryty šlach — na ŭschod.

Navat kali nie kazać pra radykalnyja scenary kštałtu anšlusu, to ŭžo sama lohika supolnaha adkazu "nataŭskim ahresaram" pahražaje pieratvaryć Biełaruś u našpihavany rasiejskaj militarysckaj mocaj placdarm. Vuń užo i najnoŭšyja "Iskandery" Maskva abiacaje, i S-400. Kaniešnie, hienerały mohuć jak dzieci radavacca novym cackam, ale nadta ž nia chočacca, kab u vyniku my atrymali na svajoj ziamli hetaki rymejk Čyrvanaściažnaj Biełaruskaj vajskovaj akruhi.

Tak što ruch Kijeva ŭ napramku NATO dy Eŭraźviazu, pry tym što moža być sapraŭdy kanjunkturna vyhadny aficyjnamu Miensku, abvastraje pahrozy biełaruskamu suverenitetu.

• 0
• 0
• 0
• 0
• 0
• 0
• 0
• 0