Upraŭleńnie Śledčaha kamiteta pa Minsku raspačało kryminalnyja spravy ŭ dačynieńni da kiraŭnikoŭ dźviuch staličnych tavarystvaŭ z abmiežavanaj adkaznaściu, jakija padazrajucca va ŭchileńni ad vypłaty padatkaŭ. Pra heta paviedamiła aficyjny pradstaŭnik Śledčaha kamiteta Julija Hančarova.
Pavodle dadzienych pravaachoŭnikaŭ, hetyja ludzi z karyślivych mierkavańniaŭ naŭmysna ŭnosili zaviedama iłžyvyja źviestki ŭ padatkovyja dekłaracyi, tym samym zanižajučy padatkovuju bazu. «Papiarednie vyjaŭlenaja suma ŭchileńnia ad vypłaty padatkaŭ składaje kala 7 młrd rubloŭ», — patłumačyła Julija Hančarova. U jakaści padazravanych pryciahnutyja čatyry čałavieki: dyrektary tavarystvaŭ i ich namieśniki. Ich dziejańni kvalifikavanyja pa č.2 art.243 KK (uchileńnie ad vypłaty sum padatkaŭ, što paciahnuła pryčynieńnie škody ŭ asabliva bujnym pamiery).
«Śledstvam vyjaŭlena, što dziejnaść firmaŭ pry ažyćciaŭleńni haspadarčaj dziejnaści była źviazanaja z pastaŭkaj ad nierezidentaŭ Biełarusi srodkaŭ abarony raślin. U kiraŭnikoŭ dadzienych subjektaŭ haspadarańnia byli praktyčna identyčnyja schiemy ździajśnieńnia supraćpraŭnych dziejańniaŭ i realizoŭvalisia na praciahu 2012-2015 hadoŭ», — dadała jana. Śledčyja praciahvajuć pracu sumiesna z hałoŭnym upraŭleńniem pa baraćbie z arhanizavanaj złačynnaściu i karupcyjaj MUS Biełarusi, pa materyjałach jakoha raspačatyja kryminalnyja spravy.
Pradstaŭnik kamiteta taksama paviedamiła: «Śledstvam prymajucca ŭsiebakovyja miery pa zabieśpiačeńni pakryćcia naniesienaj niadobrasumlennymi kiraŭnikami škody. Nakładzieny aryšt na majomaść padazravanych na ahulnuju sumu kala 130 młrd rubloŭ, u tym liku na abjekty nieruchomaści, dziasiatki transpartnych srodkaŭ».
Ciapier čytajuć
Pamiatajecie Daniiła z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ — z čaho ŭsio i pačałosia44
Kamientary