U Viciebsku hrošy na pomnik Alaksandru Nieŭskamu źbirajuć z pradprymalnikaŭ
Papierku z zaklikam pieraličyć nie mienš za 50 tysiač rubloŭ razdavali na miascovym rynku «Evikom» pradstaŭniki padatkovaj.
Rašeńnie ŭstalavać pomnik Alaksandru Nieŭskamu pryniali jašče niekalki hadoŭ tamu. Zhodna z umovami tendaru jon pavinien być vyrableny, dastaŭleny ŭ abłasny centr i zmantavany na ŭžo isnujučym pastamiencie nasuprać Błahavieščanskaj carkvy na płoščy 1000-hodździa Viciebska da 1 maja 2016 hoda. Zhodna z padańniem, viančańnie Alaksandra Nieŭskaha z kniazioŭnaj Alaksandraj (Paraskievaj) prachodziła ŭ viciebskaj Błahavieščanskaj carkvie. Adnak heta nie paćviardžajecca ŭ letapisnych krynicach.
Skulptura simvalizuje sustreču kniazia Alaksandra Nieŭskaha z žonkaj Alaksandraj (Paraskievaj) i synam Vasilom. Alaksandra była dačkoj połackaha kniazia Bračysłava Vasilkaviča, jaki da śmierci svajho baćki zajmaŭ viciebski pasad. Paśla śmierci Bračysłava ŭ Viciebsku žyła maci kniazioŭny, jakuju Alaksandra časta naviedvała. I mienavita ŭ Viciebsk paśla bitvy pad horadam Uśviaty ŭ 1245 hodzie Alaksandr Nieŭski pryjechaŭ zabrać žonku i syna. Hety fakt apisany ŭ Naŭharodskim letapisu. Varta adznačyć, što pad Uśviatami Alaksandr raźbiŭ litoŭskich kniazioŭ na čale ź Mindoŭham, jakija dajšli až da Taržka, adnak byli vymušanyja adstupić.
Pomnik budzie składacca ź fihur samoha Alaksandra Nieŭskaha z synam Vasilom na rukach i jaho žonki. Košt — bolš za 3 miljardy rubloŭ, ci kala 190 tysiač dalaraŭ. Praŭda, Piotr Padhurski, namieśnik staršyni viciebskaha harvykankama, zajaŭlaŭ, što na pomnik pojduć vyklučna pazabiudžetnyja hrošy, jak heta było z pomnikam Alhierdu.
Kamientary