Apazicyja kliča na schod u centry Minska suprać rasijskaj avijabazy
Pradstaŭniki apazicyjnych partyj i šerahu hramadskich arhanizacyj zaklikali biełarusaŭ na schod suprać raźmiaščeńnia ŭ Biełarusi rasijskaj vajskovaj bazy. Schod zapłanavany na 4 kastryčnika.
«Damova ab raźmiaščeńni na terytoryi Biełarusi rasijskaj vajskovaj bazy moža być padpisanaja ŭ bližejšym časie. Heta zhubny krok, jaki moža pryvieści da straty niezaležnaści Biełarusi. Heta zdrada našym nacyjanalnym intaresam, zdrada narodu i krainie», — skazana ŭ zajavie nad nazvaj «Za Biełaruś biez čužych vajskovych bazaŭ».
Zajavu padpisali byłyja kandydaty ŭ prezidenty Uładzimir Niaklajeŭ i Mikałaj Statkievič, staršynia AHP Anatol Labiedźka, staršynia partyi BNF Alaksiej Janukievič, namieśnik staršyni ruchu «Za svabodu» Juraś Hubarevič, staršynia ruchu salidarnaści «Razam» Viačasłaŭ Siŭčyk, aktyvist hramadzianskaj inicyjatyvy «Biełaruski ruch» Vacłaŭ Areška.
Dałučycca da zajavy dali zhodu taksama sustaršynia arhkamiteta BCHD Pavieł Sieviaryniec i aktyvisty zarehistravanaha ŭ Čechii «Maładoha frontu», pradstaŭniki biełaruskaj žanočaj partyi «Nadzieja».
Padpisanty zajavy ličać, što raźmiaščeńnie na terytoryi Biełarusi inšaziemnaj vajskovaj bazy supiarečyć 18 artykuła Kanstytucyi Biełarusi, pavodle jakoj Biełaruś imkniecca da niejtralitetu. Pavodle aŭtaraŭ inicyjatyvy, Alaksandr Łukašenka «nie źjaŭlajecca lehitymnym prezidentam Respubliki Biełaruś, nie maje prava padpisvać dakumienty i prymać rašeńni, jakija vyznačajuć los biełaruskaha narodu».
Narodny schod suprać rasijskaj vajskovaj bazy prapanavana pravieści ŭ ramkach vybarčaj kampanii 4 kastryčnika ŭ Minsku na płoščy Svabody a 17-j hadzinie.
Pavodle padpisantaŭ, tekst zajavy «Za Biełaruś biez čužych vajskovych bazaŭ» budzie źmieščany ŭ internecie i dasłany ŭ dziaržaŭnyja ŭstanovy, u tym liku ŭ Minabarony i Administracyju Alaksandra Łukašenki.
Ciapier čytajuć
Kaleśnikava: U 2020‑m ja zmahałasia nie suprać Łukašenki, a za ludziej, svabodu i svabodnyja vybary33
Kamientary