Vałavy ŭnutrany pradukt Biełarusi moža skaracicca sioleta na 2,8% u paraŭnańni z 2014 hodam, prahnazujuć śpiecyjalisty Navukova-daśledčaha ekanamičnaha instytuta (NDEI) Ministerstva ekanomiki.
Ekśpierty nahadvajuć, što ŭ pieršym paŭhodździ panižalny ŭpłyŭ na VUP akazali pramysłovaść, budaŭnictva, transpart i suviaź, aptovy handal. Niaznačny stanoŭčy ŭkład u VUP unieśli tolki sielskaja haspadarka i roźničny handal.
«U druhim paŭhodździ 2015 hoda dziejańnie niehatyŭnych faktaraŭ i najaŭnych tendencyj šmat u čym zachavajecca i, mahčyma, uzmacnicca. Pa vynikach studzienia—śniežnia 2015 hoda čakajecca skaračeńnie abjomaŭ realnaha VUP na 2,8 pracentnaha punkta da ŭzroŭniu papiaredniaha hoda, i tempy źmianieńnia VUP, raźličanyja vytvorčym mietadam, składuć 97,2%», — miarkujuć śpiecyjalisty NDEI Minekanomiki, prahnoznyja acenki jakich apublikavanyja ŭ apošnim numary «Ekonomičieskoho biulletienia», jaki vydajecca instytutam.
Na dumku śpiecyjalistaŭ NDEI, z metaj zabieśpiačeńnia makraekanamičnaj zbałansavanaści ŭ druhoj pałovie 2015 hoda treba «pradoŭžyć rabotu nad likvidacyjaj najaŭnych dyspraporcyj» u ekanomicy.
«Klučavuju ŭvahu treba nadać praviadzieńniu nieabchodnych strukturnych reform dla pavyšeńnia efiektyŭnaści funkcyjanavańnia ekanomiki Biełarusi, palapšeńnia inviestycyjnaha klimatu i raźvićcia kankurentazdolnaha asiarodździa», — ličać ekanamisty instytuta Minekanomiki.
Nahadajem, pavodle źviestak za studzień—lipień, VUP Biełarusi źniziŭsia na 4% (paśla źnižeńnia na 3,3% za pieršaje paŭhodździe). Nacyjanalny statystyčny kamitet rastłumačyŭ, što admoŭnaja dynamika VUP u lipieni była abumoŭlenaja bolš poźnim pieryjadam pačatku sielskahaspadarčych rabot pa ŭborcy ŭradžaju.
Jak paviedamlałasia raniej, aficyjny prahnoz, zaćvierdžany biełaruskimi ŭładami na 2015 hod, praduhledžvaje rost VUP na 0,2—0,7%. U toj ža čas mižnarodnyja finansavyja arhanizacyi (u pryvatnaści, Suśvietny bank) prahnazujuć, što VUP Biełarsi źnizicca ŭ 2015 hodzie na 3,5%.
U svaju čarhu, ministr ekanomiki Uładzimir Zinoŭski zajaŭlaŭ u lipieni hetaha hoda, što Minekanomiki Biełarusi prahnazuje adnaŭleńnie stanoŭčaj dynamiki VUP u druhim paŭhodździ 2015 hoda.
«My nie pierahladali aficyjny prahnoz na hety hod, chacia, kaniešnie, u roznych scenaryjach dajem roznyja acenki. Miarkujem, dasiahnutaja ŭ vyniku dziejańniaŭ urada i Nacbanka makraekanamičnaja stabilizacyja, paskareńnie rasijskaj ekanomiki ŭ druhim paŭhodździ, źnižeńnie pracentnych stavak u Biełarusi zrobiać važny ŭniosak u paskareńnie ekanamičnaha raźvićcia našaj krainy ŭžo sioleta», — zajaviŭ Uładzimir Zinoŭski, vystupajučy ŭ lipieni na pasiadžeńni sumiesnaj kalehii Ministerstva ekanomiki Biełarusi i Ministerstva ekanamičnaha raźvićcia Rasii.
Ciapier čytajuć
«Miesiacami ŭ kabinie, na siabie zabiŭ. I staŭ pytać: moža, žonka taksama budzie pracavać?». Čamu emihracyja raźbivaje siemji i što rabić, kab usio papravić
Kamientary