Biortanaŭskaja «Alisa» vykryła psichičnyja rasstrojstvy
Ciapier navukoŭcy šukajuć inšyja «filmy-detektary».
Film Cima Biortana «Alisa ŭ krainie cudaŭ» 2010 hoda i mahnitna-rezanansnaja tamahrafija dazvolili z dakładnaściu ŭ 80% vyličyć ludziej ź psichičnymi adchileńniami, pieradaje Science Daily zajavu navukoŭcaŭ Jeŭrapiejskaha kaledža niejrapsichafarmakałohii.
Jaskravy i siurrealistyčny film dazvalaje vyjavić navat słabyja ślady rasstrojstvaŭ psichiki. Mozh zdarovych i chvorych ludziej pa-roznamu reahuje na stužku — mahčyma, ludzi pa-roznamu ŭsprymajuć film i pa-roznamu staviać siabie na miesca piersanažaŭ.
U miežach ekśpierymientu film pad MRT-nazirańniem pahladzieli 32 zdarovych čałavieki i 46 čałaviek, jakija prynamsi adnojčy źviartalisia da psichijatra i prachodzili lekavańnie. Daśledčyki vyjavili, što asabliva jaskravyja adroźnieńni bačnyja ŭ pradklińni, učastku ciemiannoj doli na ŭnutranaj pavierchni abodvuch paŭšarjaŭ mozhu, mierkavana źviazanym z karotkačasovaj pamiaćciu, zrokava-prastoravaj aryjentacyjaj, śviadomaściu i razvažańniami pra siabie. Z davoli vysokaj dakładnaściu ŭ 80% atrymałasia adroźnić zdarovych ad chvorych ci niekali chvorych.
U bližejšy čas navukoŭcy pravierać, ci atrymajecca pabačyć adroźnieńni padčas prahladu inšych (siurrealistyčnych ci zvyčajnych) filmaŭ i pasprabujuć dać adkaz na toje, ci mahčyma ŭžyvać «Alisu» ŭ rańniaj dyjahnostycy psichičnych rasstrojstvaŭ.
Kamientary