Zatrymanych udzielnikaŭ pank-kancerta pad Minskam adpuścili, pratakoły nakiravali na dapracoŭku
Zatrymanych udzielnikaŭ pank-kancerta pad Minskam adpuścili, pratakoły ŭ dačynieńni da ich nakiravali na dapracoŭku, paviedamiŭ BiełaPAN adzin z arhanizataraŭ kancerta.
Nahadajem, viečaram 1 žniŭnia ŭ lesie pad Minskam prachodziŭ Augustowski Forest Gig, na jakim pavinny byli vystupić pank-hurty Destroyers, Chaos Machine, Grossman, Time2Begin, The Small i inšyja. Adnak kancert byŭ u hrubaj formie pierapynieny supracoŭnikami AMAP. Prykładna 40-50 čałaviek zašturchnuli ŭ aŭtazaki i dastavili ŭ Ždanovicki adździeł milicyi UUS Minskaha rajvykankama, raźmieščany ŭ pasiołku Ratamka.
Paśla pravierki dakumientaŭ bolšaść zatrymanych byli adpuščanyja. U dačynieńni da piaciarych maładych ludziej skłali pratakoły. Niekatorych ź ich mocna źbili. Dvuch udzielnikaŭ kancerta, jakich, pavodle niepaćvierdžanaj infarmacyi, abvinavacili ŭ drobnym chulihanstvie (art. 17.1 KoAP) i raśpivańni śpirtnych napojaŭ u hramadskim miescy (art. 17.3 KoAP), adpuścili 2 žniŭnia.
Troje ŭdzielnikaŭ kancerta pavinny byli siońnia paŭstać pierad sudom Minskaha rajona, ale sudździa nakiravaŭ pratakoły, składzienyja ŭ dačynieńni da ich, na dapracoŭku i vyzvaliŭ u budynku suda.
Maładych ludziej abvinavačvajuć u niepadparadkavańni supracoŭnikam milicyi (art. 23.4 KoAP), drobnym chulihanstvie (art. 17.1 KoAP) i raśpivańni śpirtnych napojaŭ u hramadskim miescy (art. 17.3 KoAP). Jany płanujuć źniać paboi i abskardzić dziejańni supracoŭnikaŭ milicyi ŭ prakuratury.
Jak paviedamiŭ adzin z arhanizataraŭ kancerta, supracoŭniki milicyi kanfiskavali ŭ ich muzyčnuju aparaturu i instrumienty koštam pryblizna 8 tys. dołaraŭ.
«Nam skazali, što mierapryjemstva było niesankcyjanavanym. Jano pravodziłasia biez dazvołu, tamu aparaturu i instrumienty kanfiskavali. Kali arhanizatar abjavicca, jamu budzie vystaŭleny štraf. Kali jon jaho apłacić, to tady aparaturu viernuć. Ale sprava ŭ tym, što arhanizatara jak takoha niama. Kancert byŭ arhanizavany hrupaj siabroŭ. Chtości prynios hitary, chtości — barabany, chtości — hienieratar. Kožny zrabiŭ svoj uniosak», — skazaŭ surazmoŭca BiełaPAN.
Ciapier čytajuć
Łukašenka: Razmova z Makronam doŭžyłasia 1 hadzinu 40 chvilin. Projduć pieramovy z pradstaŭnikom Francyi5
Kamientary