Затрыманых удзельнікаў панк-канцэрта пад Мінскам адпусцілі, пратаколы накіравалі на дапрацоўку
Затрыманых удзельнікаў панк-канцэрта пад Мінскам адпусцілі, пратаколы ў дачыненні да іх накіравалі на дапрацоўку, паведаміў БелаПАН адзін з арганізатараў канцэрта.
Нагадаем, вечарам 1 жніўня ў лесе пад Мінскам праходзіў Augustowski Forest Gig, на якім павінны былі выступіць панк-гурты Destroyers, Chaos Machine, Grossman, Time2Begin, The Small і іншыя. Аднак канцэрт быў у грубай форме перапынены супрацоўнікамі АМАП. Прыкладна 40-50 чалавек заштурхнулі ў аўтазакі і даставілі ў Ждановіцкі аддзел міліцыі УУС Мінскага райвыканкама, размешчаны ў пасёлку Ратамка.
Пасля праверкі дакументаў большасць затрыманых былі адпушчаныя. У дачыненні да пяцярых маладых людзей склалі пратаколы. Некаторых з іх моцна збілі. Двух удзельнікаў канцэрта, якіх, паводле непацверджанай інфармацыі, абвінавацілі ў дробным хуліганстве (арт. 17.1 КоАП) і распіванні спіртных напояў у грамадскім месцы (арт. 17.3 КоАП), адпусцілі 2 жніўня.
Трое ўдзельнікаў канцэрта павінны былі сёння паўстаць перад судом Мінскага раёна, але суддзя накіраваў пратаколы, складзеныя ў дачыненні да іх, на дапрацоўку і вызваліў у будынку суда.
Маладых людзей абвінавачваюць у непадпарадкаванні супрацоўнікам міліцыі (арт. 23.4 КоАП), дробным хуліганстве (арт. 17.1 КоАП) і распіванні спіртных напояў у грамадскім месцы (арт. 17.3 КоАП). Яны плануюць зняць пабоі і абскардзіць дзеянні супрацоўнікаў міліцыі ў пракуратуры.
Як паведаміў адзін з арганізатараў канцэрта, супрацоўнікі міліцыі канфіскавалі ў іх музычную апаратуру і інструменты коштам прыблізна 8 тыс. долараў.
«Нам сказалі, што мерапрыемства было несанкцыянаваным. Яно праводзілася без дазволу, таму апаратуру і інструменты канфіскавалі. Калі арганізатар аб'явіцца, яму будзе выстаўлены штраф. Калі ён яго аплаціць, то тады апаратуру вернуць. Але справа ў тым, што арганізатара як такога няма. Канцэрт быў арганізаваны групай сяброў. Хтосьці прынёс гітары, хтосьці — барабаны, хтосьці — генератар. Кожны зрабіў свой унёсак», — сказаў суразмоўца БелаПАН.
Няўдалае тэхнічнае рашэнне дорага абышлося арганізатарам галасавання ў Каардынацыйную раду13
Каментары