Na aŭstralijskim vostravie zdoleli vyniščyć usich myšej i pacukoŭ. Pryroda pačała adnaŭlacca
Vostraŭ Łord-Chaŭ znachodzicca prykładna za 600 km ad uschodniaha ŭźbiarežža Aŭstralii. Heta nievialiki vostraŭ vułkaničnaha pachodžańnia z unikalnaj pryrodaj — tam šmat redkich raślin i žyvioł, mnohija ź jakich nie sustrakajucca bolš nidzie ŭ śviecie, piša The Guardian.
Raniej ekasistema vostrava mocna paciarpieła z-za pacukoŭ i myšej, jakich zavieźli ludzi. Jany źjavilisia jašče ŭ XIX stahodździ i pačali źniščać usio: raśliny, nasieńnie, nasiakomych i navat ptušynyja jajki. U vyniku źnikli niekalki vidaŭ ptušak, raślin i jak minimum 13 vidaŭ biespazvanočnych.
U 2019 hodzie na vostravie praviali vialikuju prahramu pa źniščeńni hryzunoŭ — usiaho ich było kala 300 tysiač. Da hetaha vučonyja vyvučyli stan pryrody, kab potym paraŭnać źmieny.
Praź niekalki hadoŭ stała vidać, što pryroda pačała adnaŭlacca. Kolkaść nasiakomych — žukoŭ, daŭhanosikaŭ, tarakanaŭ i inšych — vyrasła prykładna na 60%. Vučonyja kažuć, što vyniki navat lepšyja, čym čakałasia.
Na vostravie ciapier viadoma bolš za 1600 vidaŭ biespazvanočnych, i kala pałovy ź ich unikalnyja. Niekatoryja vidy, jakija ličylisia źnikłymi, znoŭ źjavilisia. Naprykład, redkija vidy nasiakomych, jakich nie bačyli bolš za 100 hadoŭ.
Adnaŭleńnie nasiakomych važnaje dla ŭsioj ekasistemy. Paśla źniknieńnia hryzunoŭ u ptušak i reptylij źjaviłasia bolš ježy, pačali adnaŭlacca lasy — znoŭ rastuć maładyja raśliny, bo ich bolš nie źniščajuć pacuki i myšy.
Navukoŭcy ličać, što heta tolki pačatak. Z časam na vostravie stanie jašče bolš ptušak, jaščarak i inšych žyvioł, a ekasistema budzie i dalej adnaŭlacca.
Samaja maleńkaja niezaležnaja respublika ŭ śviecie źbirajecca praz refierendum źmianić nazvu
U Aŭstralii čałaviek zahinuŭ paśla napadu akuły
Hihanckich čarapach vypuścili na cichaakijanski vostraŭ praz 180 hadoŭ adsutnaści na im
80‑hadovuju pasažyrku kruiznaha sudna zabylisia na trapičnym vostravie. Heta skončyłasia dla jaje trahična
Ciapier čytajuć
Cichanoŭski: Cichanoŭskaj možna było ŭ 2020‑m nie pabajacca turmy. I, moža, u biełarusaŭ byŭ by šaniec114
Kamientary
Zavieźli b paru katoŭ tudy.