Z pačatku vajny na Danbasie zahinuli 2300 ukrainskich sałdat.
Jašče 270 ukrainskich vajskoŭcaŭ za hety čas źnikli bieź viestak abo znachodziacca ŭ pałonie ŭ rasijskich siłaŭ.
Takija ličby na bryfinhu pryvioŭ načalnik Upraŭleńnia cyvilna-vajskovaha supracoŭnictva Uzbrojenych sił Ukrainy Alaksiej Nazdračoŭ, paviedamlaje UNIAN.
Raniej prezident Ukrainy Piatro Parašenka nazyvaŭ ličbu 1670 zahinułych. Čynoŭnik Minabarony daje bolš trahičnyja ličby.
«Na siońniašni dzień zahinułych — kala 2300 vajskoŭcaŭ, ale skazać, kolki prapała bieź viestak — vielmi ciažka, bo, pavodle dośviedu, 40% ź ich — heta ludzi, jakija znachodziacca ŭ pałonie. Ale my jašče nie vyznačyli miesca ich znachodžańnia. I kala 60% — heta vajskoŭcy, jakija zahinuli. Tamu z 270 bieź viestak źnikłych vajennasłužačych my ličym, što dzieści 70–80 u pałonie, a astatnija, na žal, zahinuli», — skazaŭ Nazdračoŭ.
Usiaho ŭ časie bajoŭ u Danbasie, pavodle źviestak miascovych miedykaŭ, zahinuła kala 6500 čałaviek. Miarkujučy pa ličbie achviar žanočaha połu siarod ich (kala 600), prykładna 1200 čałaviek z tych, što zahinuli, byli mirnymi žycharami, astatnija vajavali z adnaho ci druhoha boku.
Rasijskija siły pasprabavali zaniać Danbas u krasaviku 2014-ha. Adnak, u adroźnieńnie ad Kryma, Ukraina tut arhanizavała supraciŭ. Ukrainskija vojski zdoleli adbić Słaviansk, Lisičansk i Maryupal, adnak paciarpieli balučyja parazy pad Iłavajskam u žniŭni 2014 i Debalcavam u lutym 2015.
Kamientary