Vajenny ekśpiert: Łukašenka śpiašajecca pravieści pieraŭzbrajeńnie, tamu źniaŭ z pasady Ziamskova
Siońnia stała viadoma, što Łukašenka źniaŭ z pasady kiraŭnika rakietnych vojskaŭ i artyleryi Uzbrojenych sił Biełarusi Aleha Ziamskova i pryznačyŭ na jaho miesca pałkoŭnika Hienadzia Kazłoŭskaha. «Naša Niva» paprasiła prakamientavać hetaja kadravaje rašeńnie vajennaha ekśpierta Alaksandra Alesina.
Alaksandr Alesin pierakanany, što adstaŭka Ziamskova – heta znakavaja padzieja dla biełaruskaha vojska.
«Mnie zdajecca, što sychod staroha kamandujučaha i pastanoŭka na ŭzbrajeńnie «Pałanezaŭ» – heta źviazanyja pamiž saboju rečy. Vidać, sprava ŭ tym, što tempy zasvajeńnia novaj techniki nie zadavalniajuć Łukašenku, tamu jamu spatrebiŭsia čałaviek novaj hienieracyi, jaki byŭ by ŭ «trendzie», što nazyvajecca, i zdoleŭ pravieści madernizacyju».
Pavodle Alesina, u Łukašenki jość čyńniki śpiašacca.
«Najchutčejšaje pryniaćcie «Pałanezaŭ» na ŭzbrajeńnie – heta sihnał našym susiedziam z usich bakoŭ ab tym, što my adpaviadajem sučasnym vyklikam i vałodajem mahutnaj zbrojaj. Zrešty, da hetaha času biełaruskaje vojska było zabiaśpiečana savieckimi i rasijskimi sistemami, što rabiła nas vielmi zaležnymi ad uschodniaha susieda. I ciapier Łukašenka, mnie zdajecca, choča hetuju zaležnaść źnizić. U dadatak da taho jon sam kazaŭ, što Rasija nie vielmi spryjaje nam u pytańniach, što datyčać pieraŭzbrajeńnia biełaruskaha vojska», — skazaŭ Alaksandr Alesin i padkreśliŭ, što teoryja ab tym, što Łukašenka «prybiraje» ruskich u kiravańni vojskam, pazbaŭlenaja padstavaŭ, bo na ŭzory Ukrainy bačna, što za urad vajuje nie mienš ruskich, čym ukraincaŭ za «apałčencaŭ».
Kamientary