Ci vierycie vy, što takoje možna sfatahrafavać na telefon?
Žury konkursu iPhone Photography Awards druhi raz adznačyła zdymak biełarusa Vadzima Jermakova. U 2014 hodzie jaho zdymak byŭ adznačany ŭ katehoryi «Architektura», u 2015-m — u katehoryi «Zachad sonca».
iPhone Photography Awards — pieršy i samy praciahły konkurs zdymkaŭ, zroblenych na smartfony Apple. Z 2007 hoda žury adbiraje najlepšyja zdymki kankursantaŭ sa 120 krain.
Žury ŭvažliva sočyć za tym, kab fota na samoj spravie byli źniatyja na smartfon, a nie prafiesijnuju kamieru, i nie byli palepšanyja ŭ hrafičnych redaktarach.
Na sioletnim konkursie «Fatohrafam hoda» byŭ nazvany palak Michał Karaleŭski — pieramohu jamu pryniesła fota staroha, jaki hraŭ tradycyjnyja pieśni na rynkavaj płoščy ŭ Varšavie. Druhoje miesca ŭ brytanca Devida Krejka sa zdymkam ptuški, «zastyłaj na ŭźlocie», a treciaje — u Ivony Lu ź Ńju-Jorka z fota šykoŭna apranutaj pary, jakaja spała ŭ ciahniku.
Asobnyja pieramožcy byli nazvanyja ŭ 18 naminacyjach: Abstraktnaje fota, kvietki, ježa, naviny… U kožnaj naminacyi byli zhadanyja i vartyja ŭvahi fota, što nie atrymali pieramohi — tak zvanyja «honorable mentions». Takim čynam byŭ adznačany i zdymak Vadzima Jermakova.
«Fatahrafavańnie na iPhone stała dla mianie chobi. Hetaja kamiera zaŭsiody pad rukoj, — raspaviadaje Vadzim. — Naprykład, majo fota, jakoje adznačyła žury, ja zrabiŭ padčas pajezdki ŭ Brajtan na poŭdni Vialikabrytanii. Ja byŭ tam na navukovaj sustrečy i ŭviečary vyrašyŭ prahulacca ŭzdoŭž mora, voś tady i złaviŭ hety zachad. Vialikuju lustranuju kamieru ŭ tuju pajezdku było niazručna ciahnuć, a biez telefona taki kadr prosta straciŭsia by».
Pahladzieć inšyja zdymki Vadzima možna na Instagram @lasteg.
Vadzim rodam z Homiela, ale źjechaŭ za miažu try hady tamu. Na siońnia jon apošni hod davučvajecca ŭ aśpirantury ŭniviersiteta Sureja ŭ Anhlii. «Pa zakančeńni ja stanu inžynieram, a voś u jakoj halinie, skazać ciažej, — tłumačyć jon. — Na takim uzroŭni daśledavańniaŭ adbyvajecca sinierhija navuk, treba viedać usiaho patrochu: i materyjałaznaŭstva, i chimiju, i fiziku, jak kłasičnuju, tak i kvantavuju».
Sam jon nie biarecca nazvać najlepšaje fota ź siolatnieha konkursu: «Mnie padabajecca hartać ŭsie fota, adabranyja žury. Arhanizatary zaŭsiody robiać vielizarnuju pracu i adbirajuć pa-sapraŭdnamu dobryja zdymki».
Kamientary