Pradstaŭnik orhana apieki ličyć nieabchodnym stroha pakarać maci, jakaja skinuła z 12-ha paviercha svajho syna

Vina 34-hadovaj minčanki, jakaja skinuła trochhadovaha syna z 12-ha paviercha, dakazanaja, miarkuje pradstaŭnik paciarpiełaha, supracoŭnik upraŭleńnia adukacyi, sportu i turyzmu administracyi Frunzienskaha rajona stalicy.

Pra heta jana zajaviła 27 maja padčas sudovaha pasiadžeńnia pa spravie maci, jakaja zabiła svajo dzicia.

Čužy dla siamji čałaviek vystupaje ŭ sudzie ŭ jakaści pradstaŭnika paciarpiełaha, zahinułaha chłopčyka, bo jaho babula admoviłasia być u statusie paciarpiełaj u sudzie.

Pradstaŭnik orhana apieki miarkuje, što abvinavačanaja pavinna być pryhavoranaja da pazbaŭleńnia voli, «nieabchodna prymianić strohaje pakarańnie», bo zabojstva było ŭčynienaje naŭmysna, u stanie ałkaholnaha apjanieńnia i zaviedama małaletniaha.

U čystasardečnym pryznańni, napisanym minčankaj paśla ŭčynieńnia złačynstva, jana zajaviła, što raskajvajecca ŭ tym, što zrabiła, i paprasiła sud nie karać jaje stroha. Praŭda, u sudzie abvinavačanaja rastłumačyła, što pisała čystasardečnaje pryznańnie pad dyktoŭku śledčaha. I mienavita jon paraiŭ nie pisać prośbu da suda ab asudžeńni da vyšejšaj miery pakarańnia.

Varta zaznačyć, što 27 maja, na treci dzień sudovaha pracesu, sudździ narešcie ŭdałosia dabicca ad abvinavačanaj jasnaha poŭnaha pryznańnia svajoj viny.

Paśla abviaščeńnia abvinavačańnia ŭ naŭmysnym zabojstvie małaletniaha syna žančyna spačatku pryznała svaju vinu poŭnaściu, a potym zajaviła, što nie chacieła zabivać dzicia, a chacieła «syści ź im».

Siońnia padčas dopytu pradstaŭnik upraŭleńnia adukacyi rajonnaj administracyi zajaviła, što siamja, u jakoj zdaryłasia trahiedyja, ni na jakim uliku nie znachodziłasia, nie była sacyjalna niepaśpiachovaj i čynoŭniki pra jaje daviedalisia tolki paśla taho, što adbyłosia. Niahledziačy na ciažkaje finansavaje stanovišča, maci-adzinočka ŭ sacyjalnyja słužby nie źviartałasia.

Adkazvajučy na pytańnie sudździ ab sistemie naboru supracoŭnikaŭ dziciačych daškolnych ustanoŭ (apošniaje miesca pracy abvinavačanaj — dziciačy sadok, pamočnik vychavalnika), mahčymym prachodžańni imi testavańnia, vyvučeńni asablivaściaŭ asoby, pradstaŭnik upraŭleńnia skazała, što pamočnikaŭ vychavalnika nabiraje niepasredna zahadčyca.

I naohuł kadraŭ nie chapaje, tamu pra niejkaje hłybokaje vyvučeńnie asoby havorka nie idzie.

Chacia, jak zaznačyła čynoŭnik, «mahčyma, i treba było b». U lubym vypadku rabotniki dziciačych sadkoŭ prachodziać miedkamisiju z atrymańniem nieabchodnych źviestak z narkałahičnaha i psichanieŭrałahičnaha dyspansieraŭ.

• 0
• 0
• 0
• 0
• 0
• 0
• 0
• 0